Кой-Таштагы окуя боюнча бир нече иш козголду
Кой-Ташта мурдагы президент Алмазбек Атамбаевди кармоо операциясы учурундагы кагылышуу боюнча кылмыш иштери козголду. Башкы прокуратуранын басма сөз кызматы сотко чейинки тергөө амалдарын башталганын кабарлады.
Мекеменин маалыматына караганда, 7-августтагы факт Кылмыш жана жоруктардын бирдиктүү реестрине Жазык кодексинин 264 жана 266-беренелери (“массалык башаламандык” жана “бейбаштык”) боюнча каттоого алынды.
7-августта Атамбаевди кармоо боюнча жүргүзүлгөн атайын операцияда күч органдары менен анын тарапкерлери кагылышты. Прокуратура тараткан маалыматта ооруканага түшкөндөрдүн саны 48 кишиге жеткени айтылат. Алардын 22си УКМКнын, экөө ИИМдин, 23 жөнөкөй жарандар. Күч түзүмдөрүнүн бир өкүлү каза тапты.
Топтолгон материалдардын негизинде факт Жазык кодексинин “Адам өлтүрүү”, “Адам өлтүрүүгө аракет кылуу” жана “Бийлик өкүлдөрүнө карата зомбулук” беренелеринин негизинде Кылмыш жана жоруктардын бирдиктүү реестрине катталды.
Мындан сырткары Атамбаевдин тарапташтарынын УКМКнын кызматкерлерин туткунга алышы боюнча Жазык кодексинин 244-беренеси ("Туткунга алуу") боюнча Кылмыштардын жана жоруктардын бирдиктүү реестрине катталды. Учурда жогоруда аталган фактылар боюнча сотко чейинки тергөө амалдары башталды.
“Ата Мекен”: Атамбаев артка кайтпайт, күч колдонууну токтотуу керек
“Мурдагы президент Алмазбек Атамбаев артка кайтпайт, күч колдонуп тирешүүнү токтотуу керек” деген билдирүү таратты 8-августта “Ата Мекен” саясий партиясы.
Партия мамлекет башчысы Сооронбай Жээнбековго жолдогон билдирүүсүндө Атамбаевди кармоо аракети туңгуюкка кептелгенин, адам өмүрү кыйылганын, күч органдары тапшырманы аткара албай койгонун белгиледи.
“Тез арада күч колдонууну токтотуп, маселени чечүүнүн башка жолдорун издөөнү талап кылабыз. Антпесе азыркы абал жарандык согушка өтүп кетиши ыктымал” деп айтылат партиянын билдирүүсүндө.
Атамбаевди кармоо операциясы 7-августта кечинде башталган. Анын тарапкерлери күч органдарына аны алып кетүүгө жол беришкен жок.
Жээнбеков Коопсуздук кеңешин чукул жыйынга чогултту
Президент Сооронбай Жээнбековдун төрагалыгы менен Коопсуздук кеңешинин жыйыны өтүп жатат.
Мамлекет башчысынын маалымат кызматы билдиргендей, прессасыз өтүп жаткан жыйындын күн тартибинде «2019-жылдын 7-августунда түзүлгөн кырдаалга байланыштуу коопсуздукту жана тартипти камсыздоо» деген маселе турат.
7-августта Кой-Таш айылында мурдагы президент Алмазбек Атамбаевди кармоо операциясы ишке ашпай калды. 48 адам жабыркап, бирөө каза болду.
Түзүлгөн кырдаалга байланыштуу мамлекет башчысы Сооронбай Жээнбеков 7-августта кыска мөөнөттүү эмгек өргүүсүн токтотуп, Бишкекке келген. (RK)
Ниязов: Атамбаев үйүндө, ал жакта кармалган жоокерлерди коё берүүнү эл чечет
Мурдагы президент Алмазбек Атамбаев Кой-Таштагы үйүндө, саат 11ге жакын ал ошол жерде чогулуп турган тарапкерлери менен жолугары айтылууда. Бул тууралуу “Азаттык” радиосуна Атамбаевдин тарапкери Фарид Ниязов билдирди.
Ниязовдун айтымында, колго түшүрүлгөн күч кызматкерлери дагы эле Атамбаевдин үйүндө, абалы жакшы. “Аларды коё бериш керекпи же жокпу, эл чечет” деп билдирди Ниязов. Анын белгилешинче, жараат алган күч кызматкерлерин ооруканага алып кетишкен, ал жакта отургандардын жарааты жок.
Ушу тапта Кой-Ташта 200дөй адам чогулуп турат. Жогорку Кеңештин депутаттарынан Асел Кодуранова, Ирина Карамушкина жана Бакыт Жетигенов жүрөт.
7-августта Атамбаевди кармоо операциясы ишке ашпай калды.