Окуя болгон жерде депутат Ирина Карамушкина да жүргөнүн көрүүгө болот.
Мурдагы президенттин Кой-Таштагы үйүнө атайын күчтөр келгенин КСДПнын расмий өкүлү Кундуз Жолдубаева да жазды.
Атайын даярдыктагы куралчан күч кызматтары Алмазбек Атамбаев өз үйүндө адаттагыдай эле эл менен жолугушууга чыкканда келишкен.
ИИМдин Тергөө кызматы Атамбаевди 8-июлдан бери үч жолу күбө катары суракка чакырып, бирок ал баруудан баш тартып келген.
Тергөө кызматы кримтөбөл Азиз Батукаевдин 2013-жылы мөөнөтүнөн мурда түрмөдөн бошотулганына байланыштуу кылмыш ишин быйыл жыл башында кайра иликтей баштады.
Жогорку Кеңеш 27-июнда Атамбаевди кол тийбестиктен ажыратуу тууралуу токтом кабыл алган. Аны утурлай башкы прокурор Өткүрбек Жамшитов парламентте маалымат берип жатып мурдагы президент Алмазбек Атамбаев 2013-жылы Батукаевди мөөнөтүнөн мурда абактан бошотууга жеке өзү тапшырма бергенин айткан.
Кой-Ташта бир канча адам жараланды
Мурдагы президент Алмазбек Атамбаевдин үйү жайгашкан Чүйдөгү Кой-Таш айылында атайын бөлүктүн аскерлери киргенде бир канча адам жарадар болгону кабарланды. Кырдаалды Кыргызстан социал-демократиялык партиясынын (КСДП) мүчөсү Мирбек Айтикеев «Фейсбукта» түз эфирде көрсөттү.
Партиянын юристи, Жогорку Кеңештин мурдагы депутаты Нурбек Касымбеков аскерлердин тепкисинде калганын айтты. Ал бети-башы шишиген абалда түз эфирде сүйлөдү. Экс-депутат Мээрбек Мискенбаев да жараат алды. Дагы бир адам колунан, бири бутунан жараат алган. Атамбаевдин тарапкерлери аларга ок тийгенин билдирип жатышат.
24.kg агенттиги кабарчысы да желим октон жараат алганын жазды.
“Фейсбуктагы” Кундуз Ажибекова аттуу колдонуучунун барагы аркылуу көрсөтүлүп жаткан түз түз эфирде айтылгандай, Кой-Ташта жаракат алгандардын саны 10 жетти. Мурдагы президент Алмазбек Атамбаевдин үйү жайгашкан аймакка кеткен жол жабылганы кабарланууда.
Атайын даярдыктагы отряддын кызматкерлери учурда жабырлануучулардын айрымдарына баштапкы медициналык жардам көрсөтө башташты.
Кой-Таш: жарадарларга аскерлер жардам берүүдө
Мурдагы президент Алмазбек Атамбаевдин үйү жайгашкан Чүйдөгү Кой-Таш айылында жараат алгандарга "Тез жардам" келгиче атайын бөлүктөгү аскерлер өздөрү жардам бере баштады. Кырдаалды Кыргызстан социал-демократиялык партиясынын (КСДП) мүчөсү Мирбек Айтикеев «Фейсбукта» түз эфирде көрсөтүп жатат. Атамбаевдин тарапкерлери онго жакын адам жарадар болгонун билдиришкен.
Атамбаевдин үйүнө атайын бөлүктүн аскерлери бастырып киргенин КСДПнын расмий өкүлү Кундуз Жолдубаева 7-августта кечки саат сегизге жакын кабарлаган. Мирбек Айтикеев «Фейсбукта» түз эфирде ок атылып жатканын көрсөтүшкөн.
Саат 20:30да "Тез жардам" барганы кабарланды.
24.kg агенттиги кабарчысы да желим октон жараат алганын жазды.
Парламент депутаты, ошол жерде жүргөн Ирина Карамушкина муну бийлик уюштурганын айтты.
Аскерлердин аракетинин чоо-жайы так маалым эмес. Расмий органдардан комментарий алууга азырынча мүмкүн болбой жатат.