Кремль: Путин Кыргызстандагы кырдаалга байкоо салууда
Орусиянын президенти Владимир Путин Кыргызстандын мурдагы президенти Алмазбек Атамбаевди кармоо операциясы боюнча кабары бар. Ал өлкөдөгү соңку кырдаалга, окуянын өнүгүшүнө байкоо салып турат. Бул тууралуу Кремлдин басма сөз кызматына шилтеме кылып «РИА Новости» агенттиги жазды. Маалыматка караганда, «Путин Кыргызстандагы соңку маалыматтарды алып жатат жана окуянын өнүгүшүнө көз салып турат».
Чүйдүн Кой-Таш айылында күч түзүмдөрүнүн кызматкерлери мурдагы президент Алмазбек Атамбаевди кармоо операциясын 7-августта кечки саат сегиздерде баштаган.
Улуттук коопсуздук боюнча мамлекеттик комитет (УКМК) кармоо операциясы жүрүп жатканын, желим октор гана колдонулганын маалымдаган.
УКМК: элге аскердик ок атылган жок
Улуттук коопсуздук боюнча мамлекеттик комитет (УКМК) «мурдагы президент Алмазбек Атамбаевди кармоо операциясында атайын даярдыктагы күч кызматкерлери жай тургундарга ок атышканы тууралуу сөздөр чындыкка дал келбейт» деген маалымат таратты.
УКМК чагымчыл, жалган маалыматтарды тараткандар мыйзам чегинде жоопкерчиликке тартылаарын эскертет. Мекеме атайын даярдыктагы күч кызматкерлери желим ок колдонгонун, ал эми үй жактан аскердик ок атылганын белгилейт.
Кой-Таштагы окуяда 23 адам жабыркады
Саламаттык сактоо министрлигинин маалыматына караганда, мурдагы президент Алмазбек Атамбаевди кармоо боюнча атайын операция учурунда жабыркагандардын саны 23кө жетти. Ушул тапта Кой-Ташта 10 "Тез жардам" бригадасы иштеп жатат.
Улуттук коопсуздук боюнча мамлекеттик комитет (УКМК) мурдагы Алмазбек Атамбаевди кармоо боюнча атайын операция жүрүп жатканын ырастаган.
Кой-Таштагы окуяда жараланган атайын бөлүктүн аскери каза болду
Мурдагы президент Алмазбек Атамбаевди кармоо операциясында жарадар болгон атайын бөлүктүн аскери каза болду. Бул маалыматты Саламаттык сактоо министрлиги ырастады.
Травматология жана ортопедия илим-изилдөө борборунун директору Сабырбек Жумабековдун айтымында, ага ок тийген.
"Ок жүрөгүн тешип кетиптир. Каза болуп калды".
Жумабеков дагы бир аскерге операция жасалганын билдирди.
Саламаттыкты сактоо министрлиги үй тараптан атылган аскердик ок чопкуттан өтүп, анын көкүрөгүн жаралаганы кабарлады.
Андан тышкары, дагы 25 адам ооруканага жатты. Аларга желим ок тийген жана башка ар кандай жараат алышкан.
