Фарид Ниязов: Атамбаев үйүндө, атайын даярдыктагы кызматкерлер кирүүгө аракет кылууда
Анын айтымында, Атамбаев өзү үйүнүн ичинде, атайын даярдыктагы күч кызматкерлери ал жакка кирүүгө аракет кылууда. Атамбаевдин 200дөн ашык тарапкерлери чогулуп турушат жана алар бушайман.
УКМК: Атамбаевди кармоо операциясында желим ок гана колдонулууда
Улуттук коопсуздук боюнча мамлекеттик комитет мурдагы Алмазбек Атамбаевди кармоо боюнча атайын операция жүрүп жатканын ырастады.
“УКМКнын атайын дайындалган күчтөрү тарабынан Алмазбек Атамбаевди кармоо боюнча атайын операция жүрүп жатат. Операция маалында атайын багыттагы аскерлер тарабынан согуштук курал колдонулган жок. Жоокерлер желим октор менен гана жабдылган. Учурда операция уланып жатат”, - деп айтылат УКМКнын билдирүүсүндө.
Кулов: Кой-Таштагы окуянын мыйзамдуулугун караш керек
Чүйдөгү Кой-Таш айылында мурдагы президент Алмазбек Атамбаевдин үйүнө атайын бөлүктүн аскерлеринин барышынын мыйзамдуулугун карап чыгыш керек. Мындай пикирин "Азаттыкка" саясатчы Фелик Кулов билдирди:
- Эгер соттун чечими болсо жана атайын бөлүктөгү аскерлердин барышы тергөөнүн аргасыз кадамы деп саналса, анда менде мыйзамдуулукка байланыштуу көп суроо жаралууда. Тергөө кай бир себептен улам шектүүнүн же айыпталуучунун үйүнө бара турган болсо, алдын-ала маалымдайт. Күч органдары жөндөн-жөн бастырып барышына ишене бербейм.
Атамбаевдин үйүнө атайын бөлүктүн аскерлери бастырып киргенин Кыргызстан социал демократиялык партиясынын (КСДП) расмий өкүлү Кундуз Жолдубаева 7-августта кечки саат сегизге жакын кабарлаган. Улуттук коопсуздук боюнча мамлекеттик комитет (УКМК) Атамбаевди кармоо операциясы жүрүп жатканын маалымдады.
Мурдагы президент Алмазбек Атамбаевдин Чүйдүн Кой-Таш айылындагы үйүнө медицина кызматкерлери келди.
Бул тууралуу учурда аймакта жүргөн КСДПнын саясий кеңешинин мүчөсү Рита Борбукеева “Фейсбуктагы” түз эфир маалында айтты.
Түз көрсөтүлүп жаткан видеодон тез жардам унааларын көрүүгө болот.