Боз үй тигип алган жергиликтүү тургундар атайын кызматтын башчысы Камчыбек Ташиевдин келишин талап кылышууда. Алар турган аймак «Кемпир-Абад» суу сактагычынын плотинасынын жанында жайгашып, Ынтымак айылынан 10 чакырым алыс.
«Жер бергенче жан бер»
«Биз жерибизди бербейбиз. Кашык каныбыз калгыча күрөшөбүз. "Жер бергенче жан бер" деген. Жан беребиз бул жерде. Бербейбиз жерибизди. Камчыбек Ташиев өзү келиши керек. Элден-журттан сурабай туруп өткөрүп бердиби? Өзү келип, элдин көйгөйүн чечип кетсин. Эл шайлаган депутаттар дагы келсин!», - деди митингге келгендердин бири Кыял Эргешбаева.
Өзүн Ынтымак айылынын тургуну деп тааныштырган Нурлан Маматов 50 гектар жер стратегиялык маанилүү аймакта экенин айтып, акцияны «жер берилбейт» деген жооп болгуча улантышарын айтты:
«Камчыбек Ташиев менен Садыр Жапаров жер бергиси келсе, башка жактан таап берсин. Биз Кыргызстандын жерин бербейбиз. Ынтымак айылынын тургундары, башка айылдардан да келип жатышат. Талабыбызды жерди бербей койгонго чейин улантабыз. Ата-бабаларыбыз бул жерлерди бербей келген, биз да бербейбиз».
"Кемпир-Абаддагы" жердин берилишине каршылар чогулду
Эл чогулган жерге келген Савай айыл өкмөтүнүн башчысы Абдусамат Абдуллаев журналисттерге комментарий берүүдөн баш тартты. Облустук милициядан нааразылык акциясы башталгандан тарта мыйзам бузуу катталбаганын билдиришти.
«Милиция ал жердеги элдин ар бир аракетине көзөмөл кылып турат. Алар нааразы болуп чыккан күндөн бери одоно тартип бузуулар катталган жок», - деди Ош облустук милициясынын басма сөз катчысы Жеңишбек Аширбаев.
Элди көтөргөн билдирүү
УКМКнын жетекчиси Камчыбек Ташиев 30-мартта Өзгөн районунда тургундар менен жолугушуу учурунда "Кемпир-Абад" суу сактагычынын плотинасынын жанынан 50 гектар жер Өзбекстанга берилгенин, анын ордуна Кыргызстан башка аймактан жер алганын айткан.
«Жанагы плотинанын эң аягында, башындагы 50 гектар жерди булар сурашты. Ошол плотинаны барып тейлей турган жол бар экен. Мен чынын айтканда барып көргөн жокмун. Биздин Мамлекеттик каттоо кызматындагылар айтышты. Плотинанын бир учу биздин жерге жайгашып калган экен. Ошол жерден булар 100 гектар жер сурады эле, мен башында чынын айтканда анча-мынча билбей туруп эле болуптур деп коюпмун. Кийин балдар "100 гектарды берсек болбой калат, ал жерде биздин чек ара заставабыз, жолубуз бар, 50 гектар берсек жетишет" деп айтып келишти. Болуптур деп 50 гектар жерди бердик».
Жергиликтүүлөр дал ушул билдирүүдөн кийин нааразылык акцияларын баштаган. Алардын айтымында жерди бербөө талабы менен акимчилик, өкмөттүн облустагы өкүлүнө да барып жолугушкан. Бирок алардын жообуна канааттанышкан эмес.
«Абал курчуп кетиши ыктымал»
Саясат талдоочу Төлөгөн Келдибаев бийлик чек ара маселесин элге түшүндүрүү иштерин жүргүзүп чечип же биротоло бербей турган чечим чыгаргандан кийин гана нааразылык токтошу мүмкүн деген пикирде:
«Эгер бийлик жерди бербөөнү чечсе, нааразылык токтошу мүмкүн. Болбосо абал курчуп кетиши да ыктымал. Ал жерде жашаган тургундардын жайыты жок, айдоо жерлери тартыш. Алардын көтөрүп жаткан талабы негиздүү».
Ташиев быйыл 24-25-мартта Ташкентте чек араны делимитациялоо жана демаркациялоо боюнча өткөн кыргыз-өзбек өкмөт аралык комиссиясынын жыйынына катышкан.
Ал бардык маселелер аймактарды алмашуу принциби менен каралып чыкканын айткан жана "Кемпир-Абад" суу сактагычы менен катар бир нече башка тилкени тактоодон өткөрүү макулдашылганын билдирген.
Президент Садыр Жапаров кыргыз-өзбек чек арасы боюнча соңку кадамдар тарыхый мааниге ээ деп эсептей турганын 27-мартта айткан.
