Түркиянын президенти Режеп Тайып Эрдоган ХАМАС радикал тобун "террордук" деп атаган өлкөлөрдү сынга алды. Ал түрк парламиентинде сүйлөп жатып, бул топту "өз жерин жана өз жарандарын коргоо үчүн күрөшүп жаткан можахеддердин боштондук тобу" катары сыпаттады.
Эрдоган ошондой эле Израилге сапарын токтотуп койгонун билдирди. Түрк президенти Анкара Тель-Авив менен алака-катышын биротоло жөнгө салууну ниеттенип жүргөнүн, бирок Израил "мындай жылуу мамиледен ашкере пайдаланып, өз кезегинде жооп катары тиешелүү кадамдарга барбаганын" белгиледи. Андан сырткары Израил менен жаңжалда Түркия Палестина тараптын "гарант өлкөсү" болууга даярдыгын билдирди.
Өткөн жылдын аягынан тартып Анкара менен Тель-Авив алака-катышын элчилердин деңгээлинде жанданткан. Анда Түркиянын Тышкы иштер министрлиги Анкара палестиналыктардын укугун коргоону улантарын эскертип келген.
Эки өлкөнүн мамилеси 2010-жылы Израилдин атайын күчтөрү Түркиядан Газа тилкесине чыккан “Мави Мармара” кемесин кармагандан кийин кескин начарлап кеткен.
Израилдин армиясы ЦАХАЛ билдиргендей, 26-октябрга караган түнү Газа тилкесинде аскерлердин катышуусунда танктар менен атайын рейд жүрдү.
Маалыматка караганда, алар "ХАМАС радикал тобунун уюктарына, алардын инфратүзүмдөрүнө чабуул коюшту".
ЦАХАЛ тараткан билдирүүдө операция "согуштук аракеттердин кийинки баскычына даярдыктын алкагында" өткөрүлгөнү айтылат.
Рейддин соңунда жоокерлер Израилдин аймагына кайтышты. Андан тышкары ЦАХАЛ Газа тилкесине абадан сокку урууну улантып жатат. ХАМАС көзөмөлдөгөн Газанын Саламаттык сактоо министрлиги чабуулдардан беш миңден ашуун кишинин өмүрү кыйылганын билдирди. Бул маалыматты башка булактардан бышыктоо мүмкүн эмес.
Буга чейин Израилдин премьер-министри Беньямин Нетаньяху 25-октябрда жасаган телекайрылуусунда ЦАХАЛ жердеги операцияга даяр экенин кайталап, ал качан башталарын тактаган жок.
Израил Газа тилкесине ХАМАС радикал тобунун 7-октябрдагы чабуулуна жооп катары сокку ура баштаган. ХАМАСтын чабуулунан 1400 израилдиктин өмүрү кыйылып, 200дөн көп киши барымтага алынган.
Үч жумадан бери Израил ХАМАС радикал тобуна жооп катары уруп жаткан соккулардан кийин Бириккен Улуттар Уюму Газа тилкесине “үзгүлтүксүз” жардам көрсөтүү зарыл экенин билдирди.
Уюмдун палестин качкындарынын иши боюнча башкармалыгынын башкы комиссары Филипп Лазарини азырынча көрсөтүлүп жаткан жардамды “күкүмгө” салыштырып, Газа тилкесине "көлөмдүү жана тынымсыз жардам көрсөтүү" керек экенин 27-октябрда белгиледи.
“Биз бул жакта сүйлөп жатканда, Газада кишилер өлүп жатат. Алар бир гана бомбалардан жана башаламандыктардан эмес, көбү Газанын блокадага алынганынан улам каза таап жатат. Дары-дармек жетишпейт, суу, тамак-аш түгөнүп баратат. Көчөлөр акыр-чикирге толо баштады. Газа тилкесинде ар кандай оорулардын жайылуу коркунучу күч”, - деди Филипп Лазарини.
Буга чейин Египеттин аймагынан Рафах өткөрмө бекети аркылуу гуманитардык жардам жүктөлгөн 74 машине киргени маалым болгон.
ХАМАС көзөмөлдөгөн Газа тилкесинин Саламаттык сактоо министрлиги израил армиясынын аба соккуларынан мүрт кеткен 7 миңден көп кишинин аты-жөнү жазылган тизмени жарыялады.
ХАМАС террордук тобу Израилге 7-октябрда кол салып, 1400дөй кишинин өмүрү кыйылган. 200дөн көп киши барымтага алынган. Израил ошондон бери Газа тилкесине абадан сокку уруп жатат.
Согуш маалында тараптардын билдирүүлөрүн көз карандысыз булактардан ырастоо мүмкүн эмес.