Бириккен Улуттар Уюмунун (БУУ) Израил аскерлерин жана ХАМАСтын согушкерлерин "токтоосуз бекем, туруктуу гуманитардык тынчтыкка чакырган " резолюциясын Тель-Авив "осол" деп атады.
Иордания сунуштаган резолюцияны БУУдагы 120 өлкө, анын ичинде Орусия да колдоду. 14 өлкө - Израил, АКШ, Австрия, Венгрия, Хорватия, Чехия, Гватемала, Парагвай жана Океаниядагы Австралия баштаган алты өлкө каршы добуш берди. 45 өлкө калыс калганын билдиришти. Бир нече өлкө добуш берүүгө катышкан жок.
Добуш берүүдөн кийин Израилдин БУУдагы өкүлү Гилад Эрдан Улуттар Уюму мындан ары легитимдүү болбосун айтып, аны "зулумдуктун мындан ары күчөшүн камсыздоого аракет кылат" деп айыптады. Анын сөзүнө караганда, ХАМАС менен эч кандай сүйлөшүү жана талкуулар болушу мүмкүн эмес. "Израил радикал топтун мындан ары да зулумдук кылышына жол бербейт" деп белгиледи Эрдан.
Израил өкүлү зомбулукту токтотууну каалагандар ХАМАСты куралын таштап, багынып берүүгө жана барымтадагыларды бошотууга чакырууга тийиш экенин кошумчалады.
Бүгүн, 28-октябрда болжол менен 300дөй адам Бишкектеги Максим Горький атындагы бакчада Газа тилкесиндеги палестиндерди колдоо акциясын улантышты.
Алар “Палестинага боштондук”, "Кыргынды токтоткула" деп жазылган плакаттарды көтөрүп чыгышты.
"Азаттыктын" кабарчысынын маалымдашынча, акция өтүп жаткан жерде милиция кызматкерлери коопсуздукту көзөмөлдөп турат.
Газанын тургундарын колдоо акциясы Бишкекте 21-октябрда да болгон. Анда катышуучулар Газа тилкесине гуманитардык жардам жөнөтүү демилгесин көтөрүшкөн.
Хамас көзөмөлдөгөн Газанын Саламаттыкты сактоо министрлиги согуш башталгандан бери Израилдин соккуларынан аймакта 8 миңден ашуун киши набыт болгонун билдирди.
Израил 1400 киши каза болгонун, 229 адам ХАМАСтын туткунунда экенин маалымдаган.