21-мартка карата дүйнөдө коронавирустан 11,5 миңге чукул киши көз жумду. Аталган илдетке чалдыккандардын саны 275 миңге чамалаганын бул жаатта статистика жүргүзүп жаткан Жон Хопкинс университети билдирди.
Коронавирустан өлгөндөрдүн саны боюнча Италия алдыңкы орунда. Андан кийин Кытай жана Иран турат. Анткен менен ирандыктардын көбү Тегеран маалыматтарды азайтып билдирип жатканын айтышууда. Расмий маалыматтарга караганда ал жакта COVID-19ду жуктуруп алгандардын саны 19 600дөн ашат.
Испанияда COVID-19 менен 21 миңден көп киши ооруп жатат.
Кыргызстанда учурда коронавирус жуктуруп алган 12 адам аныкталды. Алдардын сегизи Сузак районунун, үчөө Ноокаттын, дагы бир адам Баткен районунун тургуну. Алардын баары Сауд Арабиясына умрага барып келгендер.
