Кыргызстан Бириккен Улуттар Уюмунан (БУУ) Баткенде талкаланган объектилерди калыбына келтирүүгө жана үй-жайын таштап качкан тургундардын ордуна кайтуусуна жардам күтөт. Бул тууралуу 30-апрелде тышкы иштер министри Руслан Казакбаев БУУнун башкы катчысынын Борбор Азия боюнча атайын өкүлү Наталья Герман менен телефон аркылуу сүйлөшкөндө айтты.
Тышкы иштер министрлигинин басма сөз кызматы кабарлагандай, Казакбаев БУУнун программаларынын жана долбоорлорунун бир бөлүгүн Баткенди калыбына келтирүүгө буруу зарылчылыгын белгиледи.
Наталья Герман эки тарапка тең кырдаалды жөнгөрүүгө техникалык жардам берүүгө даярдык бар экенин билдирип, БУУнун башкы катчысы кыргыз-тажик чек арасындагы кырдаалга тыкыр көз салып турганын кошумчалады. Улуттар Уюму тараптарды чечилбеген маселелердин баарын тынч жөнгөрүү боюнча түз сүйлөшүүлөрдү улантууга чакырды.
28-апрелде кыргыз-тажик чек арасында чыккан чырдан кийин абал курчуп, Баткен жана Лейлек райондорунда атышуу болду, 29-апрелде үйлөр жана имараттар өрттөлдү, 20 миңдей жай тургун эвакуацияланды.
Жараат алган кыргызстандыктардын саны 154, каза болгондор 31 экени 30-апрелде саат 18де маалымдалды.
Тажикстандын бийлиги жабыркагандары тууралуу расмий маалымат бере элек, журналисттери 90 адам жараат алып, 12 каза болгонун билдирүүдө.
Баткен районунун Кызыл-Бел айылында 30-апрелде саат 17лер чамасында кыргыз жана тажик аскерлеринин атышуусу катталды.
“Азаттык” радиосунун кабарчылары жергиликтүү тургундарга таянып маалымдагандай, атышуу 15 мүнөттөй тынбай уланган.
Азыр айылда атышуу токтоп, абал тынч экени кабарланды.
Кызыл-Бел айылы Баткен шаарынан 15 чакырым алыстыкта, Тажикстан менен чектеш тилкеде жайгашкан. Жергиликтүү тургундардын айтымында, айылда жалаң эркектер гана калган.
Баткен районунун Көк-Таш айылындагы ок атуу учурунда каза болгон 26 жаштагы Чыңгыз Темирбаевдин сөөгү 30-апрелде жерге берилди.
Маркумдун классташы, өзүн Акжол деп тааныштырган жигит “Азаттыкка” айтып бергендей, ал 29-апрелде каза болгон:
“Кичи пейил, бардыгына активдүү катышкан, көңүл бурган жакшы досубуз эле. Балким ок тийгендир, эки снайпер иштеп жаткан деп айтышты. Досум бир туугандарынын эң улуусу болчу. Үй-жай салып, бөлүнсөм деген ниети болсо керек”.
Темирбаев Бужум айылынын тургуну болчу. Артында эки баласы калды.
Классташынын айтымында, эки-үч ай мурда кичүү баласы төрөлгөн, улуусу чоңоюп калган.
Жалпысынан Көк-Таштагы атышуу учурунда Бужум айылынан төрт киши каза болду.
28-апрелде кыргыз-тажик чек арасында чыккан чырдан кийин абал курчуп, Баткен жана Лейлек райондорунда атышуу болду, 29-апрелде үйлөр жана имараттар өрттөлдү, 20 миңдей жай тургун эвакуацияланды.
Жараат алган кыргызстандыктардын саны 154, каза болгондор 31 экени 30-апрелде саат 18де маалымдалды.
Тажикстандын бийлиги жабыркагандары тууралуу расмий маалымат бере элек, журналисттери 90 адам жараат алып, 12и каза болгонун билдирүүдө.
Кыргыз-тажик чек ара тилкесиндеги кагылышууда жабыркагандардын 25и Бишкектеги ооруканаларга жиберилди. 30-апрелде Лейлек райондук ооруканасы абалы оор жети бейтапты баш калаага учак менен жиберди. Алардын баары тең куралдуу кагылышта жарадар болгон. Исфанадагы райондук оорукананын башкы дарыгери Алымкул Абдиев жараат алган жана үй-жайын таштап качып келген жарандардын абалы, райондогу кырдаал тууралуу “Азаттыкка” айтып берди.
