Баткенде Лейлек районунун Интернационал айылынын башчысын тажик тарап барымтага алды. Бул тууралуу 30-апрелде эртең мененки саат 11де Баткен облустук ички иштер башкармалыгынын басма сөз кызматы кабарлады.
Мекеменин маалыматына караганда, 29-апрелде "Лейлек районунун Жаңы-Жер айыл аймагынын Борбордук айылына тажик аскерлерине тийиштүү техника кирген. Интернационал айылынын “Жилой дом” участогундагы кыргыз жарандарынын үйлөрүнө тажик аскер кызматкерлери кирип алган. Интернационал айылынын башчысы ошол жерге жакын аймакта эки кыргыз жараны каза болгону тууралуу маалыматты тактоо үчүн барганда тажик жарандары аны барымтага алып алышкан”.
Бул факт Лейлек райондук ички иштер башкармалыгында Кылмыштардын жана жоруктардын бирдиктүү реестрине Кыргызстандын Жазык кодексинин 380-беренеси ("Тынчтыкка каршы кылмыштар") менен катталып, сотко чейинки териштирүү башталды.
Борбордук жана Интернационал айылдарындагы соңку абал тууралуу азырынча расмий маалымат бериле элек.
Улуттук коопсуздук боюнча мамлекеттик комитеттин (УКМК) төрагасы Камчыбек Ташиев Баткенге барды. "Азаттыктын" кабарчысы саат 11:20да маалымдагандай, ушу тапта ал облустук администрацияда жабык жыйын өткөрүп жатат.
“Кызыл жарым ай” уюмунун Кыргызстандагы өкүлчүлү чек арадагы жаңжалдан улам экакуацияланган адамдарга психологиялык жардам көрсөтө баштады. Ошондой эле уюм Лейлек районундагы Рават айылына коопсуз жайга көчүрүлгөн жарандарга 100 даана гигиеналык кийим-кече жана 500 даана жылуу жууркандарды жөнөттү.
Мындан тышкары уюмдун Ош жана Жалал-Абаддагы кызматкерлери жергиликтүү элге жардам берүү максатында Баткенге жөнөп кетишти.