Кошмо Штаттарындагы кыргыз диаспорасы 3-майда Бириккен Улуттар Уюмунун Нью Йорк шаарындагы башкы кеңсесинин алдына акциясына чыгышты.
Алар 28-29-30-апрель күндөрү чек арада болгон куралдуу кагылышта тажик тараптын карапайым калкка ок атканын айыпташты.
Акцияга чыккандар чек арада өмүрү кыйылган жеткинчек кыз Мадинанын жана чырдын айынан ооруканага жетпей каза болгон беш жаштагы баланын сүрөтүн кармап турушту.
Уюштуруучулардын айтымында, кыргыз диаспорасы Баткенде жапа чеккен тургундарга жардам катары 86 миң доллар чогултушкан.
2-майда Германиянын Берлин, Гамбург, Франкфурт жана Мюнхен шаарларында жашаган кыргызстандыктар Тажикстандын дипломатиялык өкүлчүлүктөрүнүн алдына акцияга чыгышкан.
Алар кыргыз-тажик чек арасында болгон куралдуу кагылышка эл аралык коомчулукту калыс баа берүүгө үндөшкөн.
Чек ара жаңжалында талкаланган турак жайларды оңдоого 700 млн. сом бөлүндү
Кыргыз-тажик чек ара жаңжалында талкаланып, өрттөлгөн имараттарды калыбына келтирүү иштерине 700 миллион сом бөлүндү. Анын 500 миллион сому социалдык объектилерди курууга жана ремонттоого жумшалат. Калган 200 миллион сому талкаланып, өрттөлгөн турак жайларды калыбына келтирүүгө багытталат. Бул тууралуу премьер-министр Улукбек Марипов билдирди.
Өкмөттүн сайтындагы маалыматка ылайык, Баткен облусунда бир катар социалдык объектилерди куруу пландаштырылууда.
Ошондой эле Кызыл-Бел, Ак-Сай, Моргун жана Борбордук айылдарында жаңы мектеп курулат. Ак-Сай - Рават, Кулунду – Максат - Арка, Чайхана – Ак-Сай, Кызыл-Бел – Достук жолдоруна асфальт төшөлөт.
Чек ара: Кыйраган айылдар (02.05.2021)
Озонниа Ожиело: БУУ Баткенди калыбына келтирүүгө жардам берет
Бириккен Улуттар Уюмунун (БУУ) Кыргызстандагы туруктуу координатору Озонниа Ожиело Баткен облусунда чек ара чатагында талкаланган имараттарды калыбына келтирүүгө жардам көрсөтүүгө даяр экендигин билдирди. Калыбына келтирүү иштери кыргыз бийлигинин өтүнүчү менен жасалат. Ожиело мындай пикирин бүгүн, 3-майда тышкы иштер министр Руслан Казакбаев менен жолугушууда айткан.
Маалыматка ылайык, жаңжалдан кийин Баткенде кыйраган имараттарды калыбына келтирүү иштерине байланышуу БУУга бир канча өтүнүчтөр түшүп жатат.
Жаңжалда жабыркаган Максат
Жаңжалда өрттөлгөн, талкаланган турак жайларды кыргыз өкмөтү өзү калыбына келтирерин Максат айылында эл менен жолугушуу учурунда УКМКнын төрагасы Камчыбек Ташиев айткан. Ал “Азаттык” радиосунун суроосуна жооп берип жатып, өрттөлгөн үйлөрдү калыбына келтирүүнү Тажикстандан талап кылбай турганын билдирген.
28-30-апрель күндөрү кыргыз-тажик чек арасындагы куралдуу жаңжалда жүзгө жакын имарат талкаланып, өрттөлдү.
Өкмөт чек ара жаңжалында жабыркагандарга кенемте төлөйт
Маалыматты "Азаттыкка" өкмөт аппаратынын маалымат менен камсыздоо бөлүмүнүн башчысы Толкун Камчыбекова билдиргенди.
Ага ылайык, ушул тушта кыргыз-тажик чек арасындагы коогада мерт болгондорго жана жабыркагандарга төлөнүүчү кенемтенин көлөмүнө байланыштуу маселе каралып жатат.