Обращение представителей гражданского общества к Президентам Республики Таджикистан и Кыргызской Республики. 02.05.2021
Баткенде кыргыз-тажик чек ара тилкесинде жайгашкан айылдардан 33 миңден ашуун киши үй-жайын таштап качты. Анын 20 миңге жакыны балдар. Эвакуацияланган кары-картаңдар, аялдар жана балдар үчүн Баткен жана Сүлүктү шаарларындагы мектептерде, чайканаларда жана мейманканаларда убактылуу жайлар ачылды. Ошондой эле тургундар жакындарынын жана туугандарынын үйлөрүнө да жайгашкан.
Чек арадагы тиреште Баткен облусунда 78 турак-үй, эки мектеп, бир фельдшердик жана акушердик пункт, үч чек ара бекети, бир бала бакча, 10 май куюучу бекет, ички иштер бөлүмүнүн бир имараты жана сегиз дүкөн талкаланып, өрттөлгөн. Бул тууралуу өзгөчө кырдаал министринин орун басары Урматбек Шамырканов билдирди.
Маалыматка ылайык, Миң-Булак, Достук жана Максат чек ара тозоттору талкаланган. Сада, Раззаков, Арка, Максат, Достук жана Борбордук айылдарындагы үйлөр, имараттар өрттөлүп, дүкөндөр тонолгон.
Расмий маалыматка ылайык, Баткен облусундагы кыргыз-тажик чек арасындагы кагылыштарда 34 адам каза тапты. Жараат алгандардын саны 178 кишиге жетти.
Жаңжалда жабыркаган Максат
Экс-президент Роза Отунбаева элди биримдикке, сабырдуулукка чакырды.
“Ар бирибиз аракет кылалы. Жапа чегип, жабыр тарткан мекендештерге кол суналы. Мекемелер, жамааттар, коомдук уюмдар, алардын ичинде биздин фонд да ушул күндөрү тынбай Баткенге гуманитардык жардам жиберүүдө. Атышуу токтосо өрттөлгөн, кыйраган имараттарды калыбына келтирүү иштерин жүргүзүү абзел. Баткен сөзсүз гүлдөйт! Элибиздин бакубат жана тынч жашоосун камсыздоо ар бирибиздин милдетибиз”, - деп жазылган Роза Отунбаеванын кайрылуусунда.
Экс-президент жаңжалга бир беткей баа берүүдөн жана айып тагуудан карманууга, сабырдуулук менен иш алып барууга чакырды.
"Учурдагы окуялар эки мамлекеттин ортосунда, эл аралык мүнөздө болуп жатат. Ошондуктан абалды мындан ары да курчутуп албаш үчүн ачык айтылбай турган, көшөгөнүн артында сүйлөшүлө турган иштер болот. Учурда мамлекет жетекчилиги, өкмөт жана дипломатиялык корпус жигердүү аракеттерди жасап жатат. Өз тажрыйбама таянып колумдан келишинче көмөк көрсөтүп жатам. Бириккен Улуттар Уюму баш болгон эл аралык коомчулукка туура маалымат берилип, түзүлгөн кырдаалды элге туура түшүндүрүү иштери жүрүп жатат. Бирок азыркы кырдаалды сырттан бирөө келип эки элдин ортосундагы чырды бир күндө эле чечип коюшат дегендер жаңылышат. Кыргыз жана тажик элдери сүйлөшүү жолу менен тил табышат”, - деп айтылат кайрылууда.