Президенттин Баткен облусундагы ыйгарым укуктуу өкүлү Абдикарим Алимбаев Төрт-Көчө аймагы толук ачык экенин "Азаттыктын" кабарчысына жеринен ырастады.
Каржы министрлигинин 18-сентябрдагы кечки саат 18:00гө карата маалыматына ылайык, Баткенге жардам көрсөтүү үчүн ыктыярчылар ачкан атайын эсепке 18 миллион 175 миң 38 сом түштү.
Кыргыз-тажик чек арасындагы куралдуу кагылышта жабыркагандарга гуманитардык жардам чогултуу уланууда. Жер-жерлерде жардамдарды кабыл алган бир нече атайын жайлар уюштурулуп, анда чек арадагы жаңжалда жабыркап, коопсуз жайга эвакуацияланган жергиликтүү тургундарга азык-түлүк, тамак-аш, гигиеналык каражаттар, балдарга зарыл болгон буюм-тайымдарды чогултуп, автоунаа менен жөнөтүп жатышат.
"Каржы министрлигине караштуу Борбордук казыналыктын эсебине түшкөн бардык каражаттар максаттуу жана алардын кызыкчылыгы үчүн катуу жана так бөлүштүрүлөт", - деди министрдин орун басары Улан Даникеев улуттук "Кабар" маалымат агенттигиндеги басма сөз жыйынында.
Өзгөчө кырдаалдар министри Бообек Ажыкеев Баткендеги кыргыз-тажик чек арасындагы куралдуу кол салуудан улам дайынсыз кеткендерди күч түзүмдөрүнөн турган атайын топ издеп жатканын маалымдады. Министр канча адам дайынсыз экенин тактаган жок.
“Жоголуп кеткен адамдар болуп жатат. Издөө топтору түзүлүп, иштеп жатат”, - деди министр.
