Улуттук коопсуздук комитетинин (УКМК) төрагасы Камчыбек Ташиев бүгүн, 15-сентябрда Баткенге барып, чек арадагы соңку жаңжалга байланыштуу облус башчылары жана күч түзүмдөрүнүн жетекчилери менен жабык жыйын өткөрдү.
Ташиев жергиликтүү журналисттердин суроолоруна жооп берип жатып, кыргыз-тажик чек арасында кырдаал тынч экенин, ошол эле учурда чыңалуу бардыгын айтты. Ал тажик тараптан Кыргызстандын жарандык обьектилерине ок атылганын сынга алды:
"Бул жолку атышуунун өзгөчөлүгү - Тажикстан тараптан биздеги жарандык обьектилерге, үйлөргө минемоттон ок атылганы болду. Негизинен беш жерге чабуул коюлган болсо, анын төртөөндө аскердик обьектилер жабыркаса, бирөө - эл жашаган айылды бутага алган. Бул өтө кооптуу жана эч кандай эрежеге жана эч бир мыйзамга жатпайт",-деди Ташиев.
УКМКнын төрагасы чек арадагы кырдаалдын туруктулуулугун сактоого курал-жарак, аскерлер жетиштүү экенин кошумчалады.
Ташиев бул жолку ок атышууда атайын чагым болгонун, ушундан улам аймакта чыңалуу курч боюнча калып жатканын да эскертти.
"Дагы бир нерсе - тажик тараптан атайын чагым даярдалганын көрдүк. Биздин Чек ара кызматы алар жакта кара кийимчен, башка формадагы адамдар ок чыгарганын көрүп, каттоого алышкан. Алар азыр деле бир жерлерде өңүп жатышы мүмкүн. Ошондуктан, биз буга байланыштуу керектүү чечимдерди карап жатабыз. Биз мамлекетибиздин чек арасына бир метрге да эч кимди киргизбейбиз жана коопсуздугубузду сактайбыз. Биз ал шектүү адамдар тууралуу маалыматыбызды Тажикстан жана башка тараптарга айтып, кабарладык".
Ташиев өмүрүнүн коопсуздугунан чочулап, үйлөрүнөн качып чыккан тургундардын маселесин чечүүнү да караштырып жатышканын билдирди. Анын айтымында, чек арадагы соңку жаңжалга байланыштуу облустук деңгээлдеги жетекчилер сүйлөшүп, атышуу токтогон.
Тажик бийлиги чагым тууралуу дооматтарга комментарий бере элек.
Улуттук коопсуздук комитетинин (УКМК) төрагасы Камчыбек Ташиев бүгүн, 15-сентябрда Баткенге барды.
Баткен облустук администрациясынын басма сөз кызматы атайын кызматтын жетекчиси чек арадагы соңку кырдаалга байланыштуу учурда облус жана күч түзүмдөрүнүн башчылары менен жабык жыйын өткөрүп жатканын "Азаттыкка" кабарлады.
УКМКнын басма сөз кызматы Ташиевдин Баткенге сапары тууралуу азырынча маалымат бере элек.
Булак-Башыдагы өрт өчө элек
14-сентябрда тажик тараптан атылган октон улам Баткен облусунун Баткен районундагы Булак-Башы жайлоосунда чыккан өрт өчүрүлө элек. Бул тууралуу Баткен шаардык жана Баткен райондук жайыт ассоциациясынын башчысы Меңдибай Зикираев "Азаттыкка" билдирди. Анын ырасташынча, жайлоодогу өрттү койчулардын жана эки чек арачы аскердин жардамы менен өчүрүүгө аракет кылышкан.
"Бирок бул өрттү суу чачып өчүрүү оңой болбой жатат. Тик учак келет деп жатышат, күтүп жатабыз".
14-сентябрда тажик тараптан минометтен ок атылган жерде өрт тутанып, Булак-Башыдагы 20 гектардай жайыт күйүп кеткени кабарлаган. Жайлоого Өзгөчө кырдаалдар министрлигинин өрт өчүрүү техникасы барган.
Чек арага тартылган кошумча күчтөр алынды
Кыргызстандын Улуттук коопсуздук комитетине караштуу Чек ара кызматы 15-сентябрда кабарлагандай, Кыргызстан менен Тажикстан чек арага тартылган кошумча күчтөрдү алып кетти. Мунун алдында эки өлкөнүн чек ара өкүлдөрү соңку жаңжалга байланыштуу жолугуп, кырдаалды жөнгө салууну макулдашкан.
Чек ара кызматынын маалымдашынча, кыргыз-тажик чек арасында кырдаал салыштырмалуу туруктуу. Түн тынч өттү, кандайдыр бир окуялар катталган жок.
Чек арадагы кырдаалга эки өлкөнүн күч кызматкерлерги биргелешип көзөмөл кылууда. Тараптардын чек ара кезметтери 14-сентябрда атышуу болгон тилкелерге коюлган жок.
Расмий Бишкектин маалыматына караганда, 14-сентябрда кыргыз-тажик чек арасындагы үч жерде ар кайсы убакта ок атылган. Кыргызстандын Чек ара кызматы саат 08:10до Булак-Башыда, 14:00дө Как-Сай, 15:08де Паскы-Арык аймагында атышуу болгонун кабарлаган.
Маалыматка караганда, эртең мененки саат 08:10до чамасында Булак-Башыдагы тактала элек аймакка ("Капчыгай" чек ара бекетинин аймагы) Тажикстандын "Кех" бекетинин чек арачылары куралчан кирип келген. Кыргызстан алар чыгып кетүү тууралуу талапка баш ийбегендиктен кыргыз тарап эскертүү иретинде асманга үч жолу ок чыгарганын, ошондон кийин ортодо атышуу башталганын, "тажик чек арачылары миномет" колдонгонун жана ошол учурда эки жоокер жарадар болгонун кабарлаган.
Саат 14.00дө Как-Сай аймагында ок атышуу болгонун, анда тажик чек арачылары "Достук" бекетинин чек арачыларын көздөй ок чыгарганын, кыргыз тарап ага жооп бергенин билдирген.
Ал эми саат 15.08де тажик чек арачылары Кыргызстандын Паскы-Арык аймагындагы "Самаркандек" чек ара бекетинин чек арачыларын көздөй ок чыгарганын, андан кийин атышуу башталганын маалымдаган.
Кыргызстандын Чек ара кызматы атышуу учурунда тажик тараптан кара кийимчен, сакалчан адамдар эл жашаган аймактарды, үйлөрдү минемот менен аткылашканы өзгөчө кабатырлантып жатканын белгилөөдө.
Бишкек кыргыз-тажик чек арасындагы акыркы чыр-чатакта жалпысынан Кыргызстан тараптан беш адам жараат алганын, алардын экөө аскер кызматкери, үчөө жай тургундар экенин кабарлаган.
Саламаттык сактоо министрлиги кыргыз-тажик чек арасындагы чатактан 11 жаштагы бала жараат алганын маалымдаган. Ал октон жаагынан жана сол ийнинен жараат алган. Абалы орточо оор деп бааланууда.
Министрлик чек арадагы ок атышуудан жараат алган башка эки жай тургундун абалы жөнүндө да саат 21:00гө карата маалымат берди. Ага ылайык, 21 жаштагы жаран октон башынан жараат алган. Абалы орточо оор. 31 жаштагы тургундун ичине ок тийген. Анын абалы өтө оор деп бааланып, операция жасалган.
Тажикстандагы "Ховар" маалымат агенттиги өлкөнүн Чек ара кызматына шилтеме кылып, Булак-Башыда "кыргыз чек арачылары биринчи ок чыгарганын, кошумча күч жана каражат алып келгенин" жазган.
Тажик бийлиги чек арадагы окуялар боюнча расмий комментарий бере элек.
"Озоди" радиосу " өз булактарына таянып тажик тараптан эки чек арачы каза таап, 11и жаракат алганын кабарлады.
"Азия-Плюс маалымат агенттиги Исфара районундагы Ворух айылындагы булактарына таянуу менен жараат алгандардын алтоо чек арачы, бешөө жергиликтүү жашоочу экенин кабарлады" деп жазды "Озоди" радиосу.