Чек арадагы ок атышуу үчүн эки өлкө бири-бирин айыптады
Тажикстандын Улуттук коопсуздук боюнча мамлекеттик комитетинин Чек ара кызматы кыргыз-тажик чек арасындагы кагылышууга байланыштуу билдирүү таратты. Коңшу өлкөнүн “Ховар” мамлекеттик маалымат агенттиги кабарлагандай, чек арадагы окуяга Тажикстан Кыргызстанды айыптаган.
Маалыматта айтылгандай, 27-январдын кечинде, саат 17:20 чамасында Кыргызстандын элүүдөй жараны Хожа-Алъо айылына жакын жерде Тажикстандын жаранынын кум ташып бараткан “Портер” автоунаасын мажбурлап көпүрөнүн жанында токтоткон.
Тажик чек ара кызматы муну жөнгө салуу үчүн кыргыз тараптын расмийлери менен жолугуу демилгесин көтөргөн. Тажикстандын тиешелүү органы ага Кыргызстандын өкүлдөрү келбей койгонун, тескерисинче, кыргыз чек арачылары көпүрөнүн жанында позицияларды ээлеп, тажик жарандарына ок атканын билдирет.
Кыргызстан тараптан ок атуу уланып жатканын, Тажикстандын жарандарынын жана чек арачыларынын арасында курмандыктар бар экенин кабарлайт. Алар да “кыргыз тарап миномёттон ок чыгарып жатат” деп айыптап, Кыргызстандын чек арачылары "учкучсуз аппараттарды колдонуп жатканын" билдирет.
Мунун алдында Кыргызстандын Чек ара кызматынын билдирүүсүндө, саат 23:00гө карай тажик аскерлери кыргыз жоокерлеринин позицияларын маал-маалы менен аткылап жатканы тууралуу маалымат берилди. Атышуулар Эки-Таш, Кум-Базар, Чыр-Дөбө аймактарында уланууда.
Кыргызстандын Чек ара кызматы билдиргендей, Көчө-Бою аймагында "тажик тараптын аткылоосунан улам кыргызстандык жарандын үйү күйүп кеткен". Кыргызстандын чек ара кызматы "жаңжалды биринчи коңшу өлкөнүн жарандары баштаганын, алардын чек арачылары биринчи болуп ок атышканын" кабарлаган.
Кыргыз тараптан жети адам жарадар болгону маалымдалды. "Озоди" радиосу өз булактарына таянып, 17 тажикстандык жарадар болгонун, бир жайкын тургун каза болгонун жазды.
Кыргызстандын Министрлер кабинетинин расмий билдирүүсү: "27-январда кечки 6ларда Баткен облусундагы Төрт-Көчө аймагында Тажикстандын тургундары жолду тосуп башташкан. Эки тараптын Чек ара кызматы сүйлөшүүлөрдү жүргүзүп абал жайгарылган. Бирок бир аздан соң тажик тараптан башка аймак - Чыр-Дөбөдө ок атылган. Тажикстандын аскерлери чагым жасашкан. Кечке жуук эки өлкөнүн расмий өкүлдөрү ок атууну токтотууну макулдашканына карабай, тажик тараптан кайра ок атылган. Кыргызстан маселени акыркы убакка чейин чагымга алдырбай, тынчтык жолу менен чечүүгө аракеттенүүдө жана коргонуу позициясын гана карманып турат".
Кыргызстандын Саламаттык сактоо министрлигинин кыргыз-тажик чек арасында жараат алгандар боюнча 28-январдын саат 1:30дагы маалыматына караганда, буга чейин ооруканага жаткырылган төрт адамдан тышкары жаңы кайрылуулар жок. Баткен облусунун саламаттык сактоо мекемелери күчөтүлгөн тартипте иштөөсүн улантууда.
Облустук ооруканага түшкөн төрт кыргызстандыктын абалын дарыгерлер орточо оор деп баалап жатышат. Алар денесинин ар кайсы жактарына сынык тийип жараат алышкан.
Кыргыз өкмөтүнүн маалыматына караганда, 27-январда кечки алтыларда Баткен облусундагы Төрт-Көчө аймагында Тажикстандын тургундары жолду тосуп башташкан.
“Эки тараптын чек ара кызматы сүйлөшүүлөрдү жүргүзүп, абал жайгарылган. Бирок бир аздан соң тажик тараптан башка аймакта Чыр-Дөбөдө ок атылган. Тажикстандын аскерлери чагым жасашкан. Кечке жуук эки өлкөнүн расмий өкүлдөрү ок атууну токтотууну макулдашканына карабастан тажик тараптан кайра ок атылган. Кыргызстан маселени чагымга алдырбай, тынчтык жолу менен чечүүгө аракеттенүүдө жана коргонуу позициясын гана карманып турат” деп айтылат кыргыз тараптын билдирүүсүндө.
Чек ара кызматы тажик аскерлеринин аракетин Согд облусунун губернатору координациялаганын кабарлады
Кыргызстандын Чек ара кызматы кыргыз-тажик чек арасындагы жаңжалдын хронологиясын жарыялады.
Андагы маалыматка караганда, 27-январда 17:50дө Төрт-Көчө аймагына тажик жарандары таш жүктөлгөн чоң автоунаалар менен келип, Баткен-Исфана жолун торошкон.
Аларды тажикстандык чек ара күчтөрү коштоп жүргөнүн Кыргызстандын расмий органы белгилеп жатат.
Мындан соң эки өлкөнүн чек арачылары сүйлөшүп, жол ачылган. Бирок бир аз өтпөй тажик аскерлери Чыр-Дөбө деген жерде кыргыз аскерлерин көздөй минометтон ок чыгарганы кабарланды.
Буга улай Төрт-Көчө аймагында да кыргыз тарапты аткылай баштаган.
"Тажикстандын аскерлеринин аракетин Согд облусунун губернатору координация кылганы чагымдын алдын ала даярдалганын далилдейт. Чек арачылардын штаттык комплектине кирбеген минометтордун колдонулушу эл аралык жана эки тараптуу келишимдерди одоно бузуу болуп саналат"- деп айтылды Чек ара кызматынын маалыматында.
Согд облусунун губернаторуна байланышкан маалыматты Тажикстандын расмий органдары комментарийлей элек. Коңшу өлкө жаңжалга Кыргызстанды күнөөлөп жатат.
