Кыргыз тарап Көчө-Бою жана Дахма аймактарында кагылышуу уланып жатканын маалымдады
УКМКнын Чек ара кызматынын маалымат жана байланыш башкармалыгы билдиргендей, 2022-жылдын 27-январында саат 23:50дө Кыргызстан менен Тажикстандын аскер кызматкерлеринин ортосунда ок атышуу 10 мүнөткө токтогон.
Ок атышпоо маалында президенттин Баткен облусундагы ыйгарым укуктуу өкүлү Алимбаевдин Тажикстандын Согд облусунун губернатору, ошондой эле тараптардын чек ара өкүлдөрү менен жолугушуусу пландалган.
"Бирок, тажик тарап ок атышпоо боюнча эки тараптуу келишимдерди кайрадан бузуп, кыргыз тараптын позицияларын аткылоону улантты.
2022-жылдын 28-январы, саат 00:20га карата, Көчө-Бою жана Дахма аймактарында эки өлкөнүн аскер кызматкерлеринин ортосунда кагылышуу болуп жатат", - деп жазылган маалыматта.
Кыргызстандын Саламаттык сактоо министрлиги буга чейин куралдуу жаңжалда Кыргызстандын төрт аскер жарадар болгонун кабарлады.
“Озоди” радиосу өз булактарына таянып, чек арадагы атышуудан тажик тараптан бир жайкын тургун каза болгонун жазды. Маалыматты Чорку жамаатынын башчысы да ырастап, 36 жаштагы Обиджон Туйчиев мүрт кеткенин билдирди.
Куралдуу кагылышуу үчүн тараптар бири-бирин айыптап жатышат.
Лейлектеги бир нече айылдын тургундары эвакуацияланууда
Кыргыз-тажик чек арасындагы куралдуу жаңжалдан улам кооптуу аймактардан Максат, Кулунду, Сада айылдарынын тургундары жеке унаалар менен эвакуацияланууда. Бул тууралуу 28-январга караган түнү Өзгөчө кырдаалдар министрлигинен кабарлашты.
Учурда аталган министрлик кошумча жарандарды кабыл алууга даярдык көрүүдө. Бул үчүн 90дон ашууну куткаруучу тартылды.
Буга чейин жаңжалдан улам Актатыр, Жака-Өрүк, Үч-Дөбө, Самаркандек, Ак-Сай, Таш-Тумшук айылдарынын тургундары көчүрүлүп жатканы кабарланган. Алар Баткен районундагы Рават айылына жайгаштырылып жатат.
Учурда Баткендеги Жарандык коргонуу кызматтары өзгөчө кырдаал режиминде иш алып барууда.
Чек ара кызматы Тажикстан ок атууну токтотпой, аскердик техника жана күчтөрдү тартып жатканын билдирди
Кыргызстандын Улуттук коопсуздук комитетинин Чек ара кызматынын билдирүүсүндө, 27-январда "саат 22:18де тажик тараптын демилгеси менен эки мамлекеттин чек ара башчылары экинчи жолу телефондон сүйлөштү".
Маалыматка караганда, Уларбек Шаршеев менен Ражабали Рахмоналинин сүйлөшүүсүндө чек арадагы ок атууларды токтотуу тууралуу сөз болду.
"Шаршеев анда тажик тарап ок атууларды токтотпой, чек арага аскердик оор техниканы жана өздүк курамды тартууну улантып жатканын" билдирген.
23:00гө карата тажик аскерлери кыргыз жоокерлеринин позицияларын маал-маалы менен аткылап жатканы маалыматта айтылды. Атышуулар Эки-Таш, Кум-Базар, Чыр-Дөбө аймактарында уланып жатканы кабарланды.
Чек ара кызматы билдиргендей, тажик аскерлери Кыргызстандын куралдуу күчтөрү жайгашкан жерди "миномет менен аткылаган, Көчө-Бою аймагында тажик тараптын аткылоосунан кыргызстандык жарандын үйү күйүп кеткен".
27-январдын кечинде кыргыз-тажик чек арасында атышуу болду. Кыргызстандын УКМКсынын Чек ара кызматы анда "тажик тарап миномет жана гранатомётторду колдонуп жатканын" маалымдаган.
УКМКга караштуу Чек ара кызматы кыргыз-тажик чек арасындагы жаңжал эмнеден чыкканы боюнча маалымат таратты.
Анда айтылгандай, 27-январда кечки саат 17:50дө Төрт-Көчөгө Тажикстандан жүк ташуучу машинелерге таш жүктөп бир нече адам келген. Алар Баткен-Исфана жолуна ташты түшүрүп, бөгөп салган. Аталган мекеменин басма сөз кызматы бул топту тажик чек арачылары коштоп жүргөнүн кабарлайт.
"Эки өлкөнүн чек арачыларынын сүйлөшүүсүнөн соң жол кайрадан ачылган. Бирок тажик тарап макулдашууларга карабай, Чыр-Дөбө аттуу жерден Кыргызстандын күч түзүмдөрүн миномет, гранатометтор менен аткылаган. Андан соң тажикстандык күч түзүмдөрү Төрт-Көчө тилкесинде кыргыз аскерлерин аткылашкан. Тажикстандын аскерлеринин бул аракети чагымдын алдын ала даярдалганын далилдейт. Чек арачылардын штаттык комплектине кирбеген минометтордун колдонулушу эл аралык жана эки тараптуу келишимдерди одоно бузуу болуп саналат. Кыргыз тараптын ок атышууну токтотуу талабын аткарбай, электр тогу өткөн зымдарды, кыргыз чек ара заставаларын аткылап жатышат", - деп жазылган Чек ара кызматынын басма сөз кызматы тараткан билдирүүдө.
Атышуулар түнкү саат 23:45те дагы деле уланганы маалым болду.
Тажик бийлиги чыр эмнеден чыкканы тууралуу расмий маалымат бере элек.