Вице-президент Майк Пенс жубайынын коштоосунда келди. Президент Доналд Трамптан айырмаланып, Пенс инаугурацияга катышууну чечкен.
Капитолийдин тепкичтеринде орнотулган аянтчага шайланган вице-президент Камала Харристин үй-бүлө мүчөлөрү келишти. 56 жаштагы Харрис ант бергенде бул кызматтагы биринчи аял жана ак расадагы эмес саясатчы катары тарыхка кирип калат.
Алардын аркасынан Жо Байдендин балдары менен неберелери келишти.
Жо Байдендин инаугурациясына коноктор чогулуп жатат. Ардактуу коноктор катары мурдагы президент Билл Клинтон жубайы Хиллари менен, анын аркасынан экс-президент Жорж Буш жубайы Лора менен, андан кийин дагы бир мурдагы мамлекет башчы Барак Обама жубайы Мишель менен келишти.
Көп узабай Жогорку соттун судьялары ант берүү өтчү жерге чогулушту.