Байден ант берүүгө даярданып жаткан маалда Трамп Ак Үйдөн чыгып, Флоридага учуп кетти

АКШ тарыхында мурда болуп көрбөгөндөй талаш-тартыш менен коштолгон президенттик шайлоодон кийин демократ Жо Байден 20-январда жергиликтүү (Вашингтондогу) убакыт боюнча саат 12.00дө Капитолийдин тепкичинде туруп, 46-президент катары ант бермекчи. Муну менен 78 жаштагы карыя саясатчы өлкөнүн тарыхындагы эң улгайган мамлекет башчы болуп калат.

Акыркы 152 жылдын ичинде биринчи жолу өлкөнүн кызматтан кетип жаткан президенти ант берүү аземине катышпайт. Инаугурация аземине мурдагы президенттер Жорж Буш, Билл Клинтон жана Барак Обама катышмакчы. Ал эми 96 жаштагы Жимми Картер аземге катыша албастыгын мурда билдирген.

Трамп жергиликтүү убакыт боюнча 08.15те Ак Үйдөн чыгып, тик учак менен Эндрюс аба базасына барды. Ал жерден үй-бүлөсүнө жана санаалаштарына кайрылып: “Сиздердин президентиңиздер болгонума абдан сыймыктанам. Рахмат”, - деп айтты.

Өз администрациясынын жетишкендиктери катары Трамп армияны “кайра куруу”, салыктарды азайтуу, согуш ардагерлерин камсыздоо, Жогорку соттун үч мүчөсүн дайындоо, коронавируска каршы вакцинаны иштеп чыгуу чараларын эскерди.

“Мен ар дайым сиздер үчүн күрөшөм, жакындан байкап турам жана сиздерге кулак салам,” – деди Трамп.

Андан кийин ал жубайы Мелания жана башка үй-бүлө мүчөлөрү менен президенттик учакка отуруп, Флорида штатына учуп кетти.

Ал эми вице-президент, республикачы Майк Пенс бир катар партиялаш конгрессмендер менен биргеликте демократ Жо Байдендин президент катары ант берүү жана кызматка киришүү аземине катышмакчы.