АКШнын Мэн штатындагы Льюистон шаарында куралчан кишинин ок атуусунан кеминде 22 кишинин өмүрү кыйылып, 50дөн ашууну түрдүү жараат алды. Кылмышка шектүү азырынча кармала элек. Полиция элди этият болууга жана көчөгө чыкпоого чакырды.
Шектүүнүн тек-жайы такталган, ал 40 жаштагы Роберт Кард болуп чыкты. Полиция анын курал кармап турган сүрөтүн жарыялады жана өтө коркунучтуу кылмышкер катары сыпаттады.
Ок атылганы тууралуу полицияга Schemengees ресторанынан жана Sparetime Recreation боулинг-холлдон маалымат түшкөн. Эки жайдын ортосундагы аралык 6,5 чакырымды түзөт жана машина менен 10 мүнөттө жетсе болот.
Ак үй куралдуу кол салуу тууралуу порезидент Жо Байденге маалымат берилгенин, ал ыкчам маалыматтарды алып турганын билдирди.
X социалдык тармагы аркылуу тараткан маалыматта Мэн штатынын полициясы: "Льюистондо куралдуу адам ок атып жүрөт. Үйдө болуп, эшиктерди бекитип отуруңуздар. Коопсуз жайда жашынып турууңуздарды суранабыз", - деп жазган.
Макала дагы толукталат.
