Пакистанда балдарды шал оорусуна каршы эмдеген медиктерди коштоп жүргөн машине минага кабылганда алты полиция кызматкери жараат алды. “Машаал” радиосу расмий адамдарга шилтеме менен окуя 9-сентябрда өлкөнүн түндүк-батышында болгонун кабарлады. Уруулар байырлаган Түштүк Вазиристандын Вана шаарындагы полиция жетекчиси жарылуудан 9 киши жараат алганын, үчөө карапайым тургундар, бири бала, калгандары тартип коргоочулар экенин билдирди.
Дүйшөмбү күнү Пакистанда полиомиелитке каршы эмдөө өнөктүгү башталды. Анын жүрүшүндө 5 жашка чейинки 3 миллиондой баланы вакцинациядан өткөрүү каралууда. Пакистан бул жугуштуу оору жоюла элек дүйнөдөгү эки өлкөнүн бири.
Ооганстанда талибдер эмдөө менен алектенген топторду бутага алып келчү. 2021-жылы бийликке кайтып келген “Талибан” кыймылы илдетти түп тамыры менен жок кылуу үчүн БУУ менен иштешерин билдирген.
Быйыл Пакистанда полиомиелитке кабылган наристелердин саны көбөйүп, 17 учур катталды. Белучистан аймагында 3 бала чарчап калды.
Премьер-министр Шехбаз Шариф өкмөт ооруну жоюу үчүн провинциялардын бийликтери менен биргелешип чара көрөрүн билдирген.
Балдарды шал оорусунан коргогон дары-дармек жок, бирок жайылуусун эмдөө аркылуу алдын алса болот. Аны жоюу боюнча эл аралык деңгээлдеги аракеттер жемиштүү болуп келгени менен Ооганстан менен Пакистан вирустан дагы деле арыла элек.
