Транспорт жана коммуникациялар министрлигинин кызматкерлери Бишкек шаарында Өзбекстандан келген кесиптештери менен жолугуп, эл аралык жүк ташуу маселесин талкуулады. Бул тууралуу аталган мекеменин басма сөз кызматы "Азаттыкка" кабарлады. Маалыматка караганда, жолугушууда 2025-жылга эл аралык жүк ташууга керектелчү уруксат кагаздарынын өлчөмүн көбөйтүүнү сүйлөштү.
Өзбек делегациясын Транспорт министрлигине караштуу Логистика жана транспорт маселелерин изилдөө, өркүндөтүү борборунун башчысы жетектеп келди. Алар менен Кыргызстандын Транспорт башкармалыгынын башчысы Аскар Эсеналиев баштаган министрликтин кызматкерлери жолукту.
Аталган мекеме жүк ташууга байланыштуу быйыл канча уруксат кагазы берилгенин жана ал канчага көбөйтүлөрүн тактаган жок.
Буга чейин Министрлер кабинетинин төрагасы Акылбек Жапаров Бишкектеги кыргыз-өзбек бизнес форумунда эки өлкөнүн ортосундагы товар жүгүртүүнүн көлөмү өскөнүн билдирген. Ага ылайык, 2022-жылы 11 айда бул көрсөткүч 543 миллион доллардан ашкан. Бул мурдагы жылга салыштырмалуу 21% жогору болгон. (КЕ)
