Президент Садыр Жапаров 18-майда жети жана андан көп балалуу энелерге “Баатыр эне” орденин ыйгаруу боюнча жарлыкка кол койду. Документке ылайык, Бишкек, Ош жана Кыргызстандын жети облусу боюнча 588 энеге орден ыйгарылган.
Кыргызстанда жети жана андан көп балалуу энелерге “Баатыр эне” наамы ыйгарылат. 1992-жылдан бүгүнкү күнгө чейин “Баатыр эне” орденин алгандардын саны 40 миңге жакындады. Алардын арасында пенсия алууга укугу жок болгондуктан социалдык жөлөк пул гана алгандар бар.
Кыргызстанда жыл сайын май айынын үчүнчү жекшембисинде Энелер күнү белгиленет. Быйыл Энелер күнү 19-майга туш келди.
