Кыргызстандык балбан Айаал Лазарев быйыл Парижде өтө турган жайкы Олимп оюндарына жолдомо алды.
Лазарев 12-майга караган түнү Түркиянын Стамбул шаарында күрөш боюнча Олимпиадага дүйнөлүк тандоо мелдешинде, 125 килограмм салмакта жарым финада венгриялык Даниел Лигетини 12:2 эсебинде жеңди.
Буга чейин ал 1/8 финалда ямайкалык Аарон Жонсонду 10:0, чейрек финалда өзбекстандык Хасанбой Рахимовду 11:2 эсебинде утуп, жарым финалга чыккан.
Ушуну менен Кыргызстандын эсебинде Парижде өтө турган жайкы Олимп оюндарына 11 лицензия бар.
Буга чейин кыз-келиндер күрөшүнөн Айсулуу Тыныбекова, Айпери Медет кызы, Мээрим Жуманазарова, грек-рим күрөшүнөн Амантур Исмаилов, Жоламан Шаршенбеков, Акжол Махмудов, Үзүр Жусупбеков, эркин күрөштөн Бекзат Алмаз уулу, Эрназар Акматалиев жана сууда сүзүүдөн Денис Петрашов Олимпиадага катышууга укук алган. (ECh)
