Кыргызстанда учурда 53 548 ата-эне балдарына алимент төлөөдөн качып жүргөнүн Жогорку Сотко караштуу Сот департаментинин башчысы Урмат Кожомбердиев 22-апрелде Жогорку Кеңештин Социалдык саясат комитетинин жыйынында билдирди. Анын сөзүнө караганда, арасында жылдап төлөбөй жүргөндөрү бар.
"Бир нече айлап, айрымдары жылдап алимент төлөбөй жүргөндөрү бар", - деди Кожомбердиев.
Жогорку Кеңештин депутаты Элдар Абакиров акыркы убакта ажырашуулар көбөйгөнүң, балдардын расмий никеси жок үй-бүлөлөрдө төрөлүүсү да көбөйүп жатканын билдирип, Министрлер кабинетин бул маселеге көңүл бурууга чакырды.
2023-жылы Кыргызстанда балдарына чегерилген алиментти атасы же энеси төлөбөй жатканын айтып, сотко кайрылгандардын саны 41 миңден ашкан. Сот департаментинин маалыматына ылайык, 2022-жылы мындай ата-энелердин саны 39 655 адамды түзгөн. Төлөнбөгөн карыздардын жалпы суммасы 10 миллиард сомдон ашары кабарланган.
Сот департаментинин 2023-жылы апрелдеги маалыматына ылайык, Кыргызстанда ар кандай айып пул, алимент жана башка карыздарын төлөбөгөн 71 миң жарандын өлкөдөн сыртка чыгышына тыюу салынган. 2022-жылдын жыйынтыгында төлөнбөгөн карыздар 22 миллиард сомдон ашкан.(ZKo)
