Улуттук коопсуздук боюнча мамлекеттик комитет (УКМК) тарабынан кармалып, кийин үй камагына чыккан “Тон Манжылы Сервис” ишканасынын башкы директору Мирбек Исмаилов үйүнөн асынып каза болгон. Бул маалыматты “Азаттыкка” Тоң районунун Күн-Чыгыш айыл аймагынын айыл өкмөтүнөн тастыкташты.
Маркумдун сөөгү бүгүн, 15-мартта жерге берилди.
Мирбек Исмаилов эмне үчүн мындай кадамга барганы тууралуу маалыматтар жок.
УКМК 1-мартта тендер боюнча кылмышка шектелип “Тон Манжылы Сервис” ишканасынын башкы директору кармалганын 13-мартта билдирген. Ал Каракол шаарындагы №23 тергөө абагында жаткан.
Атайын кызмат тараткан маалыматка ылайык, Күн-Чыгыш айыл өкмөтүнүн кызмат адамдары тарабынан атайын айыл чарба техникаларын сатып алуу боюнча тендер өткөрүүдө мыйзам бузуу фактысы аныкталып, ал боюнча кылмыш иши козголгон.
Ысык-Көл облустук сотуна Мирбек Исмаиловдун жактоочусу апелляциялык арыз менен кайрылып, шектүү 12-марттан 28-апрелге чейин үй камагына чыгарылган.
Учурда Исмаиловдун жакындарынан анын өлүмү боюнча кенен маалымат алууга мүмкүнчүлүк боло элек. (AsK)
