Улуттук илимдер академиясына караштуу Сейсмология институтунун маалыматына караганда, 14-март күнү саат 10:49да Кыргызстан менен Өзбекстан чектешкен жерде очогунда күчү 3,4 баллды түзгөн жер титирөө катталды.
Силкинүү Ош облусунун Араван районунун Мангыт, Кочубаев жана Кызыл-Коргон айылдарында 2,5 баллга чейин сезилген. Жер титирөөдөн жабыркагандар жана кыйроолор катталган жок.
Кыргызстан менен Өзбекстандын чектешкен аймагында, очогунда күчү 3,5 баллга жеткен жер титирөө 1-мартта да катталган. Силкинүү Ош облусунун Араван районунун Керкидан, Ноокат районунун Найман айылдарында 3 балл болгон.
Быйыл январь-февраль айларында Кыргызстандын аймагында жер бир нече жолу силкинди.
23-январга оогон түнү, саат 00:09да Кытайдын аймагында күчү 8 баллга жеткен жер титирөө катталды.
Кыргызстандын Өзгөчө кырдаалдар министрлиги силкинүү Жети-Өгүз районунун “Кумтөр” ишканасынын аймагында 6 балл, Каракол шаарында, Тоң районунун Кажы-Сай айылында 4,5 балл, Нарын шаарында 4 балл, Бишкек шаарында 3 баллга жеткенин, баштапкы маалыматтар боюнча андан кыйроолор жана жапа чеккендер жок экенин кабарлаган. (ZKo)
