Башкы прокуратура сугат тармактарына бөлүнгөн акча каражатын кымырып алган кызмат адамдарына кылмыш иши козголгонун маалымдады.
Көзөмөл органынын басма сөз кызматы кабарлагандай, Сокулук райондук прокуратурасы Чүй облустук өнүктүрүү фондунун, Кызыл-Туу жана З. Кайназарова атындагы айыл өкмөттөрүнүн кызматкерлерине карата Кылмыш-жаза кодексинин 337-беренеси (“Кызмат абалын кыянаттык менен пайдалануу”) менен кылмыш ишин козгоду.
Маалыматка ылайык, 2022-жылы 24-августта “Н.Л”. жеке ишканасы менен райондук тийиштүү кызматкерлер “Сугат тармактарын капиталдык оңдоо” жана “Эски темир-бетон лотокторду алмаштыруу” долбоорлорун ишке ашыруу боюнча түзүлгөн келишимдин талаптарын бузуу менен эч кандай жумуштар аткарылбаса дагы, жасалма акт түзүп, “Н.Л” ишканасына 5 млн 773 миң 813 сом которуп жиберишкени текшерүүдө аныкталган.
Прокуратура белгилегендей, 2022-жылдан ушул күнгө чейин “Н.Л.” ишканасы келишимде көрсөтүлгөн жумуштарды аткарбай, мамлекетке өзгөчө ири өлчөмдө материалдык зыян келтирген.
Кылмыш ишин иликтеп-тергөө Сокулук районудук ички иштер бөлүмүнө тапшырылган.(ZKo)
