Мамлекеттик салык кызматынын төрагасы Алтынбек Абдувапов Кыргызстанда көмүскө экономиканын үлүшү 30% чейин жетерин билдирди.
Бул тууралуу ал Жогорку Кеңештин Укук тартиби, кылмыштуулук менен күрөшүү жана коррупцияга каршы аракеттенүү боюнча комитетинин 26-декабрдагы жыйынында депутат Алишер Эрбаевдин суроосуна жооп берип жатып айтты.
Депутат өлкөдө ар кайсы мамлекеттик мекемелердин көмүскө экономиканын үлүшү боюнча статистикасы ар башка экенин билдирди.
“Экономика министрлигинин баяндамасында 70%, Акылбек Үсөнбекович 35-40% дейт. Улуттук статистика комитети 27% деп жатат”, - деди Алишер Эрбаев.
Былтыр Мамлекеттик салык кызматы 2023-2025-жылдардагы өнүктүрүүнүн стратегиясын бекиткен. Анда жаңы стратегия салыктарды чогултууну жакшыртуу, көмүскө экономиканын көлөмүн азайтуу жана адилеттүү салык системасын түзүүгө багытталганы айтылган.
Буга чейинки ар кандай изилдөөлөрдө Кыргызстанда көмүскө экономика 40-50% түзөрү айтылып келген.
Мамлекеттик органдарга ишмердиги тууралуу маалыматы түшпөгөн товарларды алып-сатуу жана кызмат көрсөтүүлөр көмүскө экономика деп аталат. (BTo)
