Быйыл 11 айда 464 этностук кыргыз "кайрылман" макамын алды. Бул тууралуу Эмгек, социалдык өнүктүрүү жана миграция министрлигинин башкармалыгынын башчысы Жыпара Мамбетова 18-декабрдагы брифингде билдирди. Анын айтымында, "кайрылман" макамын алгандардын көбү Тажикстандан көчүп келгендер. Мындан сырткары Өзбекстан, Орусия, Түркмөнстан, Кытай жана Ооганстандан келип, арыз менен кайрылгандар бар.
Алардын көбү мектептерде окушат. 28 киши иш менен камсыз болгон.
2022-жылы башка өлкөлөрдө жашаган 507 этностук кыргыз "кайрылман" макамын алган. 4549 киши бул макамдын негизинде Кыргызстандын паспортуна ээ болгон.
Буга чейин башка өлкөлөрдөн көчүп келген кыргыздардын 10 миңдейи документи жок жүргөнүн депутат Жанарбек Акаев айтып чыккан. (КЕ)
