Келерки жылы 24-январдан тарта Бээжин – Бишкек – Бээжин багыты боюнча жаңы аба каттам ачылат. Бул тууралуу Кыргызстандын Кытайдагы элчилиги 13-декабрда билдирди.
Маалыматка ылайык, кытайлык China Southern Airlines авиакомпаниясы бул багыт боюнча каттамды аптасына үч жолу – дүйшөмбү, шаршемби, жума күндөрү аткарат.
Буга чейин “Манас” аэропорту 12-декабрдан тарта Бишкектен Кытайдын Чэнду шаарына түз аба каттам ачылганын билдирген.
Учурда Кыргызстандан Кытайга жүргүнчү ташуучу түз авиакаттам катары Бишкек – Үрүмчү – Бишкек багыты аткарылат. Каттам 2021-жылы убактылуу токтоп, 2022-жылы кайрадан иштей баштаган.
Мындан сырткары Бишкектен Шанхайга жана Гонконгго жүк ташуучу авиакаттамдар бар. Калган багыттарга жүргүнчү жана жүк ташуучу каттамдар башка өлкөлөр аркылуу аткарылат.
