Венесуэланын президенти Николас Мадуро Гайананын мунайга бай Эссекибо аймагын аннексиялоо боюнча алты жарлыкка кол койду.
Бул тууралуу Венесуэланын Ultimas Noticias гезити билдирди. Кабыл алынган чечимдердин арасында Венесуэланын жаңы картасын ратификациялоо жана өлкөнүн 24-штаты деп жарыяланган жана Гайана-Эссекибо деп аталган аймактын бирдиктүү жетекчисин дайындоо бар.
Аннексия тууралуу чечим Венесуэладагы референдумдун жыйынтыгы менен кабыл алынды. Расмий маалыматта, добуш бергендердин 95% Эссекибонун кошулушун колдогон.
Шайлоо боюнча эксперттер жана маалымат каражаттары шайлоочулардын аз катышканынан жана добуштарды бурмалоодон улам шек санашууда. Венесуэланын Борбордук шайлоо комиссиясы референдумдун жыйынтыгын азырынча жарыялай элек.
Мадуро венесуэлалыктарды аннексияны сындагандарды айыптоого чакырды. "Чыккынчылык жетишет, бешинчи колонка жетиштүү", - деди ал.
Мунун алдында Гайананын президенти Ирфаан Али анын өкмөтү аскерий жардам сурап өнөктөштөрүнө кайрылганын Associated Press жазды. "Эгер Венесуэла мындай ойлонулбаган жана авантюристтик аракеттерин уланта берсе, аймак жооп берүүгө аргасыз болот. Биз ушу менен алек болуп жатабыз. Биз аймактык жоопту даярдап жатабыз", - деди Али.
Венесуэла да, Гайана да Эссекибо калкынын пикирин сурашкан жок – аймакта 125 миңдей адам жашайт.
Бул аймактын аннексияланышын Британия, Улуттар шериктештиги, Кариб коомчулугу жана Америка мамлекеттеринин уюму айыптаган. Түштүк Американын жалпы базары (МЕРКОСУР) да жооп даярдап жатат. АКШ Гайананы колдоду. Бразилия кырдаалга тынчсыздануусун билдирип, Түштүк Америкада согушту каалабай турганын айтып, сүйлөшүүлөргө ортомчу болууга даяр экенин билдирди. Орусия Мадуронун Москвага сапарын 2023-жылдын аягына чейин деп жарыялады.
Эссекибо өлкөнүн дээрлик төрттөн үч бөлүгүн ээлейт жана болжол менен Тунистин аянты менен барабар. Венесуэла бул аймакка Испаниядан көз карандысыз болуп чыккан 1811-жылдан бери доомат артып келет. Ал эми Эссекибо Гайана колониясы болгондуктан Британияга караган. Кырдаал 2015-жылы Эссекибодо мунай жана газ кендери табылганда курчуган.
2023-жылдын декабрынын башында Эл аралык сот Венесуэланы Гайана менен аймактык талашта кырдаалды өзгөртүүчү аракеттерден карманууга чакырган.
