Кыргызстанда бала бакчаларда тамактанууну уюштуруу ата-энелердин эсебинен ишке ашырылат. Финансы министрлигинин басма сөз кызматы "Азаттыкка" ырастагандай, 11-августта "Билим берүү жөнүндө" мыйзамдын жаңы редакциясы кабыл алынган.
Анын 28-беренесинин 6-пунктуна ылайык, мектепке чейинки билим берүү уюмдарында тамактанууну уюштуруу ата-энелердин (мыйзамдуу өкүлдөрүнүн) эсебинен жүзөгө ашырылат.
Бул кандай ишке ашат, бала бакчага төлөнчү акча жогорулайбы, жокпу - азырынча айтыла элек. Буга чейин балдардын тамагы 50/50 менен, жарымы ата-эненин, жарымын жергиликтүү бийликтин эсебинен каржыланып келген.
Социалдык тармактарда бала бакчалардагы тамак-аш үчүн эми ата-энелер төлөй турганы жөнүндө маалыматтар тараган.
Кыргызстанда бала бакчанын жетишсиздиги - социалдык орчундуу маселелердин бири. Быйыл үй шартында бала бакча ачып иштетем дегендерге талаптар жеңилдетиле баштады. Расмий маалымат боюнча, Кыргызстанда 1712 бала бакча бар, аларда 199 миңдей бөбөк тарбияланып жатат. (КЕ)
