Бүгүн, 29-августта Жалал-Абад шаарында испаниялык “Барселона” клубунун футбол академиясынын ачылышы өтөт.
Бул иш-чарага катышуу үчүн Кыргызстанга “Барселона” клубунун президенти Жоан Лапорта жана клубдун мурдагы оюнчулары Карлес Пуйоль, Эдгар Давидс, Ривалдо жана башка оюнчулар келди.
Бул күнү президент Садыр Жапаров 29-августта “Барселонанын президенти жана өкүлдөрү менен жолугушуп, алар жаштардын футболго кызыгуусун арттырып, шык берип келерин билдирди.
Коноктор футболдук академиянын ачылышына катышып, ушул эле күнү Жалал-Абад шаарындагы “Курманбек стадионунда көргөзмө оюн өткөрөт.
30-августта Бишкек шаарындагы Дөлөн Өмүрзаков атындагы стадиондо “Барселонанын” мурдагы оюнчулары Азиянын ардагер футболчулары менен беттешет.
Буга чейин “Барселона” клубунун Жалал-Абаддагы футбол академиясын ачууга президент Садыр Жапаровдун жана Улуттук коопсуздук боюнча мамлекеттик комитетинин төрагасы Камчыбек Ташиевдин жакындары катышып жатканы кабарланган.
26-августта президент Садыр Жапаров “Кабарга” курган маегинде муну ырастап, мамлекет буга 16 гектар жер гана бөлүп бергенин билдирген. Калган чыгымдарды Жапаров-Ташиевдер менен чет өлкөлүк инвесторлор көтөрө турганын тактаган.
Президент билдиргендей, “Барселона” клубу Бишкек шаарына өз каражатына футбол академиясын ачат.
"Барселона" - 1899-жылы негизделген каталониялык футбол клубу. Ал Испания боюнча 77, эл аралык жана европалык 20 титулдун ээси. “Барселона” академиясы жана клубдун Борбор Азиядагы башка франшизалары JalGroup Asia компаниясына таандык болот.
