Кыргызстандын Улуттук банкы 8-августка карата сомдун чет элдик валюталарга карата катышы тууралуу маалыматты чыгарып, орус рублинин баасын мурдагы курска караганда 1,4% төмөндөттү.
Расмий курска ылайык, 1 рубль 92 тыйынга барабар болуп калды.
Бул күнү коммерциялык банктарда 1 рубль орточо 90-91 тыйындан сатып алынып, 94-95 тыйындан сатылууда. Акча алмаштыруучу жайлар болсо 89-90 тыйындан алып, 93-94 тыйындан сатышууда.
Орус валютасынын курсу жыл башынан бери 1 сомдон жогору баада кармалып келип, 24-июнь күнү Кыргызстанда кескин төмөндөгөн.
Коммерциялык банктар бир рублди 78-90 тыйындан алып жатканы кабарланган. Рублдин арзандашына ал күнкү Орусияда Пригожиндин "куралдуу козголоңу" таасир эткени айтылган.
Улуттук банк рублдин баасын июнь айында теңме-тең кармап турса, июлда 95-97 тыйын менен жыйынтыктады. Августтун башында 1 рубль 93-94 тыйынга түшүп калган.
Улуттук банктын сайтында жазылгандай, 8-августка карата 1 АКШ доллары 87,87 сомдон, 1 евро 96,43 сомдон болуп жатат. Казак теңгеси 19 тыйын деп бааланууда. (ErN)
