Улуттук коопсуздук боюнча мамлекеттик комитет (УКМК) өзгөчө ири өлчөмдөгү акчаны мыйзамсыз чыгарып кетүүгө шек саналып “Кыргызнефтегаз” ишканасынын мурдагы жетекчилиги кармалганын кабарлады.
Расмий маалыматка караганда, шектүү күйүүчү-майлоочу майларды арзандатылган баада сатуу үчүн жалданма фирмалардын тармагын уюштуруу боюнча коррупциялык схема түзгөн деп айыпталууда. Кийин аталган фирмалар жоюлуп, 400 миллион сомдон ашык салык төлөнбөй калганы аныкталган.
"2017-2020-жылдар аралыгында “Кыргызнефтегаз” башкармалыгынын мурдагы төрагасы Б.Р.А. жетекчилиги астында күйүүчү-майлоочу майларды арзандатылган баада сатуу үчүн келишимдерди түзүү максатында жалданма фирмалардын тармагын уюштуруу боюнча коррупциялык схема аныкталды. Базар баасы менен сатуунун ортосундагы айырма бир литр мунай продуктылары үчүн 5 сомду түзүп, ал айырмачылык “Кыргызнефтегаз” ААКнын жетекчилиги, бийликтин жогорку баскычтарындагы алардын колдоочулары тарабынан өздөштүрүлгөн", - деп жазылган Атайын кызматтын маалыматында.
УКМКнын маалыматына караганда, шектүүнүн төрт жылдык башкаруу учурунда компаниянын кирешеси 2 млрд. 977 млн. сомду түзсө, жетекчилик алмашкандан кийин акыркы эки жылда (2021-2022-жылдары) ишкананын таза кирешеси 5 млрд. 800 млн. сомдон ашуун сумманы түзгөн.
УКМК Кылмыш-жаза кодексинин "Коррупция" беренесиниин негизинде кылмыш ишин козгоп, “Кыргызнефтегаздын" мурдагы жетекчилигине карата тергөө амалдары жүрүп жатат.
Козголгон кылмыш ишин тергөөнүн жүрүшүндө “Кыргызнефтегаз” ишканасынын мурдагы жетекчилиги 300 миллион сомдон ашык суммадагы кыймылдуу жана кыймылсыз мүлктөрдү сатып алуу фактылары аныкталып, алар учурда камакка алынды.
Коррупциялык схеманы уюштурууга көмөктөшкөн төрт адам кармалып, УКМКнын Жалал-Абад облусундагы тергөө абагына камалды. Азыркы учурда мамлекетке келтирилген зыянды аныктоо жана анын ордун толтуруу чаралары көрүлүп, тергөө иштери жүрүп жатат. (КЕ)
