Өзбекстандын Тышкы иштер министрлиги Азербайжандын Ирандагы элчилигине куралдуу кол салууну айыптады.
"Бул окуяны тыкыр иликтөөнүн жыйынтыгы менен күнөөлүүлөрдүн баары жоопко тартылат деген ниеттебиз", – деп айтылат билдирүүдө.
27-январда куралчан адам Азербайжандын Тегерандагы элчилигине чабуул жасаган. Ал элчиликтин имаратын Калашников автоматы менен аткылаган. Чабуулдан дипломатиялык өкүлчүлүктүн коопсуздук кызматынын башчысы каза таап, эки күзөтчү жараат алган.
Азербайжандын президенти Илхам Алиев муну теракт деп баалаган. Тегеран иликтөө башталганын маалымдады.
Жекшембиде Азербайжан Тегерандагы элчилигинде иштеген кызматкерлерин жана алардын үй-бүлөлөрүн Ирандан эвакуациялай баштаганын Reuters агенттиги расмий маалыматка таянып билдирди.
