Улуттук коопсуздук боюнча мамлекеттик комитетине (УКМК) караштуу Чек ара кызматы Кыргызстан менен Казакстандын ортосундагы чек ара өткөрмө бекеттери кадимки калыбында иштеп жатканын маалымдады.
Мекеменин басма сөз кызматы кабарлагандай, 18-декабрь, саат 15:00гө карай бардык өткөрмө бекеттеринде адамдардын жана унаалардын тыгыны байкалган жок. Жөө жүргүнчүлөрдөн, айдоочулардан эч кандай арыз-дооматтар катталган эмес.
Чек ара кызматы кыргыз-казак чек арасындагы өткөрмө бекеттеринде жарандардын документтерин текшерүү 1-1,5 мүнөткө созуларын белгиледи.
Буга чейинки тыгындын себеби тууралуу маалымат берген жок.
16-17-декабрда кыргыз-казак чек арасындагы "Ак жол", "Ак-Тилек", "Чоң-Капка" бекеттеринин Кыргызстан тарабында элдин жана машиненин саны көбөйүп, тыгын жаралганы тууралуу маалыматтар тараган.
Буга чейин чек арадагы жүк ташуучу машинелердин тыгыны бир канча жолу катталып, өкмөттөр аралык сүйлөшүүлөр өткөн.(ZKo)
