Украин президенти Владимир Зеленский орус аскерлери чегинип кеткен Херсондогу “бардык маанилүү инфраструктура” талкаланганын билдирди. Ал Херсондо электр жарыгы, байланыш жана телекөрсөтүү орус аскерлери тарабынан атайылап жок кылынганын айтты.
Зеленский 14-ноябрда бошотулган Херсонду кыдырып чыккандан кийин түнкү видео кайрылуусунда "Орусиянын желеги бул – толук кыйратуу дегенди билдирет", - деди.
14-ноябрда Украинанын улуттук энергетикалык компаниясы "Укрэнергонун" жетекчиси Орусия Херсон облусунун бүтүндөй оң жээгин жана Николаев облусунун маанилүү бөлүгүн камсыздаган негизги энергетикалык инфраструктураны талкалаганын билдирген.
"Бошотулган Херсон облусунун көпчүлүк бөлүгү 6-ноябрдан бери электр жарыгысыз калды", - деди компаниянын башчысы Владимир Кудрицкий.
Өткөн дем алыш күндөрү Херсондун бошотулушу - Украинанын орус баскынчылыгы башталгандан бери дээрлик тогуз ай ичиндеги эң чоң ийгиликтеринин бири болду.
Зеленский Херсонго иш сапары учурунда шаардын бошотулушун “согуштун бүтүшүнүн башталышы” деп айткан.
Орусия Украинага 24-февралда кол салган.
