Чүйдө ант берүү иш-чарасынан кийин жол кырсыгына кабылган курсанттардын тогузу ооруканага түшкөнүн, дагы 12си аскердик госпиталга жаткырылганын 28-августта “Азаттык” радиосуна Коргоо министрлигинен билдиришти.
Госпиталда дарыгерлердин көзөмөлүнө алынган 12 аскер 29-августта чыгарылары айтылды.
Мекеменин басма сөз кызматынын башчысынын орун басары Толкун Райымжановдун айтымында, машина Кыргызстандын Куралдуу күчтөрүнүн Аскер институтуна таандык, жабыркагандардын абалын дарыгерлер канааттандырарлык деп мүнөздөп жатышат:
“Жабыркагандар бар. Биринчи медициналык жардам көрсөтүлүп, тогуз адам медицина мекемелерине жактырылган. Калгандары аскер дарыгерлеринин көзөмөлүндө. Алардын абалы канааттандырарлык. Бул факт боюнча кызматтык иликтөө жүрүп жатат”.
Окуя 27-августта болжол менен саат 11:50 чамасында “Ата-Бейит” тарыхый мемориалдык комплексинен 300-400 метр аралыкта болгон. Ичинде курсанттар отурган автоунаа комплекстен чыгып, Бишкекти көздөй кетип баратканда жол боюндагы бакты сүзгөн.
Интернетте тарап жаткан маалыматтарга караганда, Аскер институтунун курсанттарын «Ата-Бейитке» ант бердирүү үчүн алып барышкан. (RK)
