Ысык-Көл облусунда көлдү мыйзамсыз балык уулагандардын торунан тазалоо башталды. Облустун ички иштер башкармалыгы көлдү тазалоого милиция кызматкерлери жана жергиликтүү тийиштүү органдар катышып жатканын маалымдады.
20-августта башталган рейддин жүрүшүндө Ысык-Көлдүн бардык акваториясында, жээктен 30-35 чакырым алыстыкта жана 25-30 метрге чейинки тереңдикте браконьерлердин торлору алынат. Баасы арзан болгондуктан браконьерлер балык кармагандан кийин балык уулоочу торду чыгарбай кетишет.
19-августта президенттин Ысык-Көл облусундагы өкүлү Алтынбек Сулайманов баштаган жетекчилерге президенттин “Ысык-Көлдүн экологиясын сактоо боюнча кечиктирилгис чаралар жөнүндө” жарлыкты ишке ашыруудагы кемчиликтер үчүн эскертүү берилген.
Ысык-Көл милициясы жыл башынан бери экологиялык коопсуздук багытында 100 кылмыштын бети ачылганын билдирди. Аныкталган фактылар боюнча 64 кылмыш иши козголуп, анын 16сы боюнча тергөө бүтүп, сотко өткөн. Жалпы материалдык зыян 2 млн. 970 миң 522 сомду түзгөн.
Рейд учурунда Ысык-Көлдүн акваториясынан жалпы узундугу 27 500 метр 275 браконьерлик торлор тазаланып алынган. Мыйзамсыз балык уулаганы үчүн 25 браконьер кармалган. (TSh)
