Айыл чарба министрлигинин Жер ресурстары кызматына караштуу «Кадастр» мамлекеттик мекемесинин директору 25-июлда коррупцияга шектелип кармалганын Улуттук коопсуздук боюнча мамлекеттик комитет (УКМК) билдирди.
Атайын кызматтын 26-июлдагы маалыматына караганда, мекеменин жетекчилиги кол астындагы кызматкерлерден акча талап кылуу боюнча туруктуу коррупциялык схема түзгөнү, “текшерүүчү органдарга берилет” деген шылтоо менен алардын айлыгынан 3-6 миң сомдон кармап калып жатканы аныкталды жана бул факт документтештирилди.
“Алынган далилдердин негизинде «Кадастр» мамлекеттик мекемесинин директору С.Э.К. Кылмыш-процессуалдык кодексинин 98-беренесине ылайык УКМКнын тергөө абагына киргизилди. Тергөө иштери жүрүп жатат” деп айтылат УКМКнын маалыматында.
Жер ресурстары кызматынын сайтындагы маалыматта «Кадастрдын» директорунун аты-жөнү Эрнест Сулайманбеков экени жазылып турат.
Былтыр Сулайманбековго карата пара алууга байланыштуу иш козголгону маалымдалган. (RK)
