Ирандын Маданият жана шарият миниcтрлиги «Паранжы жана пакизалык» мыйзамынын алкагында аялдарга эми жарнамаларга тартылууга тыюу салынганын эскертти.
Дем алышта «Домино» деген балмуздактын рекламасында актриса калың свитердин үстүнөн кабат-кабат кийим кийип, аягында парка жана кышкы шапкачан бараткан кадрдан кийин өкмөт жарнама агенттиктерине тиешелүү көрсөтмө таратты.
Министрлик ал жарнаманы «кылмыш» деп атап, аял актрисанын көргөзүлүшүн "адеп-ахлакка сыйбаган жүрүм-турумду жаюу" катары сыпаттады.
Президент Эбрахим Раисинин 5-июлдагы буйругу менен паранжы тууралуу мыйзам катаалдаштырылып, кыз-келиндердин кийимине жаңы чектөөлөр киргизилген. Адеп-ахлак полициясы барган сайын активдүү болууда. Социалдык тармактардагы видеолордон алар аялдарды кармап, машинелерге салып алып кетип жатканын көрүүгө болот.
Мыйзамга баш ийбеген кыз-келиндер мамлекеттик ишкана, банктарга, коомдук транспортко кире алышпайт.
Активисттер нааразылык иретинде #no2hijab деген хэштег менен онлайн өнөктүк башташты.
1979-жылкы Ислам революциясынан кийин Иранда аялдар жана тогуз жаштан чоң кыздар коомдук жайларда паранжы кийүүгө милдеттендирилген.
