Чолпон-Ата шаарында өткөн Борбор Азия мамлекет башчыларынын төртүнчү консультативдик жолугушуусунда Садыр Жапаров Азербайжандын мындан аркы жыйындарга байкоочу катары катышуу ниетин билдирди. Тышкы иштер министрлерине бул маселени карап чыгуу тапшырылды.
Чолпон-Ата шаарында өткөн Борбор Азия мамлекет башчыларынын төртүнчү консультативдик жолугушуусу аяктады. Кеңешмеге төрагалык кылуу Эмомали Рахмонго өткөрүлүп берилди.
Садыр Жапаров: Ал жакта кырдаал татаал жана алдын ала болжоп айтууга болбой турат. Биздин оюбузча талибдердин бийликке келиши жана алар түзгөн өкмөт бул азыркы катаал реалдуулук. Мындан улам биз бул багытта биргелешкен жолду аныктап алышыбыз керек. Ошол эле маалда коңшубуз Ооганстандын туруктуу өнүгүүгө бет алышына болгон аракетибизди жумшашыбыз керек. Биз ооган өкмөтү менен эки тараптуу кызматташуу жаатында байланышыбыз бар экенин белгилеп кетейин. Өткөн жылы биз ал жакка гуманитардык жардам жеткирдик. Ооган өкмөтүнүн жетекчилери менен аймактагы коопсуздукка байланыштуу бир катар жолугушууларды өткөрдүк.
Президент Садыр Жапаров бүгүн, 21-июлда Чолпон-Ата шаарында өтүп жаткан Борбор Азия мамлекеттеринин башчыларынын төртүнчү консультативдик жолугушуусунда сүйлөп жатып, чек ара аймактарын достук менен ишенимдин көпүрөсүнө айлантууну сунуштады. Ал аймакта болгон кайгылуу окуялар "деструктивдүү күчтөрдөн, анын ичинде диний фанаттарды жана кылмышкерлерди өз тарабына тарткан тышкы күчтөрдөн коопсуздукту камсыздоо маселелерин алдыңкы планга чыгарганын" белгиледи.