Пакистандын түштүк-батышында автобус кырсыгынан кеминде 19 адамдын өмүрү кыйылды, ондогон киши жаракат алды.
Белужистан провинциясынын Ширани аймагынын бийлиги билдиргендей, Исламабаддан Кветта шаарына бараткан автобустун ичинде жалпы 35 жүргүнчү болгон. Маалыматка караганда, айрым жарадарлардын абалы оор.
Алдын ала версиялар боюнча, тоолуу аймакта бараткан автобустун айдоочусу катуу жааган нөшөрдөн улам рулду башкара албай калган.
Пакистанда жолдордун начардыгынан жана машинелердин эскилигинен автокырсыктар көп катталат. Июнь айында ушул эле Белужистан провинциясында автобус жардан кулап, 22 кишинин өмүрү кыйылган.
