Президенттин Жогорку Кеңештеги мурдагы өкүлү Курманбек Дыйканбаевдин аракетинде кылмыштын курамы жок деген негиз менен күнөөсүз деп табылып, акталды. Тиешелүү өкүмдү Бишкектин Биринчи май райондук соту быйыл 24-майда чыгарганын райондук соттун басма сөз кызматы кабарлады.
Улуттук коопсуздук боюнча мамлекеттик комитет (УКМК) Курманбек Дыйканбаевди 2020-жылы ноябрь айында кармаган. Атайын кызмат ал ошол эле жылы октябрь айындагы парламенттик шайлоодо кайсы бир партиянын кызыкчылыгы үчүн мамлекеттик ишканалардын биринин жетекчисин кызматтан алып саларын айтып, 7 млн. сомдон ашык каражат талап кылган деп айып койгон.
2020-жылы ошол кездеги Финансы полициясынын жетекчиси Бакир Таиров Курманбек Дыйканбаев мамлекеттик ишканадан 7 млн. сом алганын айткан. 2021-жылы Дыйканбаев тергөө менен кызматташууга барып, бюджетке 7 млн. сом төгүп бергени кабарланган.
Дыйканбаев кызмат абалынан пайдаланып мыйзамсыз алган акчаны шайлоо өнөктүгүндө көп добуш алууга колдонгону айтылып, Жазык кодексинин (ред: 2017-жылдагы) “Алдамчылык” жана “Кызмат абалынан кыянаттык менен пайдалануу” беренелери менен кине тагылган.
Ал 2020-жылы жыйынтыгы жокко чыгарылган парламенттик шайлоого кызматын убактылуу токтотуп, “Биримдик” партиясынын тизмеси менен 58-катарда катышкан.
Курманбек Дыйканбаев президенттин Жогорку Кеңештеги өкүлү болуп 2018-2020-жылдары иштеген. Жогорку Кеңештин бешинчи чакырылышында “Республика” фракциясынан депутат болгон. (BTo)
