Министрлер кабинетинин төрагасы Акылбек Жапаров президенттин аймактардагы ыйгарым укуктуу өкүлдөрү жана район акимдери менен видеоконференция байланышы аркылуу жыйын өткөрдү. Бул тууралуу өкмөттүн расмий сайтында кабарланды.
Жыйында жазгы-талаа иштеринин жүрүшү, президенттин "үй-бүлөлүк салтанаттарды жана маркумду эскерүү үрп-адаттарын тартипке келтирүү боюнча чаралар жөнүндө" жарлыгынын аткарылышы, жерлерди трансформациялоо жана башка актуалдуу маселелер каралган.
"Аймактардагы төрөт үйлөрүнүн абалына, сөөк коюуга байланыштуу жер маселесине көңүл бургула", - деди Жапаров.
Ал ошондой эле, өкмөт мамлекеттик банктар аркылуу таштандыларды кайра иштетүүчү ишканалар сыяктуу бизнес долбоорлорду биргелешип каржылоого даярдыгын билдирген.
2021-жылы Конституция өзгөргөндөн кийин облус жетекчилери президенттин расмий өкүлү деп аталат. Район акимдерин дагы президент дайындайт. Министрлер кабинетинин төрагасы Акылбек Жапаров президенттин администрация жетекчиси болуп саналат.
