Сумы облусу 14 жолу аткыланды
Украинанын Сумы облусунун аскердик администрациясы билдиргендей, жекшембиде Орусиянын армиясы 14 жолу чабуул койду.
21 жардыруу болду. Николаев, Белопольск, Краснопольск, Новослободск, Эсманьск, Шалигинск кыштактары соккуга кабылды.
Бийлик орусиялык күчтөр дрон учуруп, минометтордон аткылаганын, авиабомба таштаганын билдирди.
Орус тарап комментари берген жок.
Украина: Запорожье 177 жолу аткылоого кабылды
Орусиянын армиясы Запорожье облусунун тогуз калктуу пунктуна акыркы суткаларда 177 жолу сокку урганын аймактын башчысы Иван Федоров билдирди.
Анын айтымында, орусиялык күчтөр Темировкага төрт жолу абадан сокку урду. Лобково, Гуляйполе, Новоандреевка, Новоданиловка, Работино, Малая Токмачка, Малиновка жана Левадное кыштактарына 80ден ашык дрон чабуулу болду.
Киев Орусия туткунга алган тогуз украиналык жоокерди атып өлтүргөнүнө байланыштуу Бириккен Улуттар Уюму (БУУ) менен Кызыл чырым уюмуна кайрылды. Бул тууралуу өлкөнүн акыйкатчысы Дмитрий Лубинец билдирди. Ал туткундардын өлтүрүлүшү Женева конвенциясын олуттуу бузуу болорун айтты жана мындай аракеттер жазасыз калбашы керектигин, душман толук жоопкерчиликкке тартылышы зарылдыгын билдирди.
Мунун алдында айрым басылмалар Курск облусунда колгон түшкөн украиналык жоокерлерди Орусия атып өлтүргөнүн жазып чыгышкан. Маалыматтарга караганда, окуя 10-октябрда болгон.
Москва мындай дооматтарга азырынча комментарий бере элек.
Колго түшкөн туткундардын өлтүрүлүшү тууралуу Киев менен Москва бири-бирин күнөөлөп келет.
Ушул жылдын башында Украинада орусиялык аскерлер туткундарды өлтүргөн деген 50дөн ашык кылмыш иликтенип жатканы маалымдалган.
Былтыр мартта БУУнун Адам укуктары комиссарлыгы мындай 40тай учур катталганын жарыялаган. Анын 25 учурунда орусиялык аскерлер өлтүрүлсө, 15инде украин жоокерлери атылганын жарыялаган.
Согуш туткундарын өлтүрүүгө эки өлкөдө тең мыйзам менен тыюу салынган жана эл аралык укукта аскердик кылмыш деп эсептелет.
Украиналык "КиберБорошно" долбоору аннексияланган Крымдагы Феодосия портундагы мунай кампасынын спутниктен тартылган сүрөттөрүн жарыялады. Анын негизинде аналитиктердин ырасташынча, өрттө 12 резервуар жабыркап, сегизи толугу менен күйүп кеткен. Ошондой эле порттогу имарат дагы толук өрттөнгөн жана анын жанындагы аймактардан миңден ашык адам эвакуацияланган.
Феодосиядагы мунай базасында өрт 7-октябрга караган түнү тутанган жана беш күндөн кийин гана өчүрүлгөн. Украинанын куралдуу кучтөрү бул жайга дрондор менен чабуул жасалганын билдирген.
Феодосия мунайды кайра жүктөө терминалы көлөмү жагынан Крымдагы эң чоң терминал. Крым.Реалии басылмасынын ырасташынча, жарым аралда эки гана мындай терминал бар, экинчиси Севастополдо жайгашкан.
Украинанын Куралдуу күчтөрү 12-октябрда Луганск облусунун оккупацияланган бөлүгүндөгү мунай кампасына сокку урулганын кабарлаган. Билдирүүдө бул базада "Орусиянын армиясы да керектеген" кара май, мунай өнүмдөрү сакталып келгени, бул жайда өрт тутанганы жазылган. Анын алдында Орусиянын Өзгөчө кырдаалдар министрлиги Ровеньки шаарында май куюлган жайда өрт чыкканы, ал өчүрүлгөнүн маалымдаган.