Орусиянын Коргоо министрлиги жекшембиге караган түнү Курск жана Белгород облустарынын үстүндө абадан коргонуу системалары үч дронду жок кылганын билдирди.
Дагы бир учкучсуз учак Азов деңизинин үстүндө атып түшүрүлгөнүн маалымдады.
Белгород облусунун губернатору Вячеслав Гладков эртең менен өзүнүн Телеграм-каналында бир нече дрон атып түшүрүлгөнүн жазды.
Дрон калдыктарынан Белгород облусунун бир катар айылдарында автоунаалар, үйлөрдүн фасаддары жана тосмолор талкаланган. Жабыркагандар жана каза болгондор жок.
Украинанын аба күчтөрү жекшембиге караган түнү 25 учкучсуз учактын 24ү атып түшүрүлгөнүн жарыялады.
2-июнга караган түнү орус аскерлери Украинага “Искандер-К” канаттуу ракетасы, С-300 зениттик ракетасы жана 25 дрон менен чабуул койгонун Украинанын Аскердик аба күчтөрүнүн командачысы Николай Олещук билдирди.
Анын айтымында, 24 учкучсуз учак – Николаев, Одесса, Херсон, Киев, Хмельницкий, Днепропетровск, Кировоград, Винница облустарында атып түшүрүлгөн.
Украинанын Аскердик аба күчтөрүнүн билдирүүсүнө ылайык, Искандер-К жана С-300 ракеталарын атып түшүрүү мүмкүн болгон эмес.
1-июнга караган түнү орусиялык армия Украинанын жарандык жана энергетикалык инфраструктурасына сокку урду. 20 адам жабыр тартты. Бул тууралуу украиналык расмий мекемелер билдиришти.
"Орусия Харьков облусундагы эс алуу базасына кол салды", - деп жазды Украинанын ИИМнин башчысы Игорь Клименко. Анын айтымында, 12 адам жабыркаган, арасында балдар да бар. Алардын абалы орточо оор деп бааланууда.
Клименко орусиялык дрон Никополдогу маршруттук автобусту аткылап, төрт адам анын ичинде бала жараат алганын билдирди. Дагы төрт адам Львов облусундагы аткылоодон жабыркаган.
Украинанын Чукул кырдаалдар кызматы Харьков облусунда Балаклеи тилкесиндеги эл жашаган аймакка орусиялык ракета түшүп, эки үй өрттөнүп кеткенин билдирди.
Түндөгү чабуулдан бир катар облустардагы энергетикалык объекттер кыйраганын Украинанын энергетика министри Герман Галущенко ырастады.
Украинанын аба күчтөрүнүн билдиришинче, Орусия ар кандай үлгүдөгү 53 ракета жана 47 дрон кое берген. 35 ракета жана 46 дрон атып түшүрүлгөн.
Орусиянын Коргоо министрлиги армия узакка атылуучу курал менен Украинанын аскердик өндүрүштүк комплексинин ишин камсыздаган энергетикалык объекттерин атканын тастыктады. Мекеме чабуулду Киевдин "орусиялык энергетикалык объекттерге жана транспортко зыян келтирүү аракетине" жооп катары түшүндүрдү.
Кытай июнь айында Швейцарияда өтө турган Украинадагы согушту токтотуу конференциясына өзүнүн өкүлдөрүн жибербейт. Бул тууралуу Reuters агенттиги төрт булакка таянып жазып чыкты. Буга чейин Украинанын президенти Владимир Зеленский Кытай лидери Си Цзинпинге кайрылып, Тынчтык саммитине катышууга чакырган.
Агенттиктин маектештеринин айтымында, Бээжин мындай чечимди анын катышуусу үчүн зарыл болгон шарттар аткарылбагандыктан кабыл алган. Алардын арасында саммитке “бардык тараптардын бирдей катышуусу жана бардык сунуштарды ачык талкуулоо” үчүн Орусияны дагы, Украинаны дагы чакыруу шарты болгон. Буга чейин мындай шартты Кытайдын Тышкы иштер министрлиги да айтып келген.
Швейцария чыр-чатакты чечүү үчүн “Орусия бул процесске тартылышы керек" деп эсептегени менен, Москва бул конференцияга чакырылган эмес. Владимир Зеленский мунун себебин Украина Москванын бул процессти үзгүлтүккө учуратышын каалабайт деп түшүндүрдү. Алар ортомчулар аркылуу орус өкүлдөрүн кийинки этапка тартууну пландап жатышат. Өз кезегинде Орусия Украинадан аскерлерин чыгаруу маселесин талкуулоо ниети жок болгондуктан, чакырылган күндө да жыйынга катышпай турганын билдирген.
Швейцариянын Тышкы иштер министрлигинин өкүлдөрүнүн айтымында, саммитке 160тан ашуун делегация чакырылган. "70тен ашуун мамлекет Тынчтык саммитине катышарын ырасташты, алардын көбү мамелекет жана өкмөт башчыларынын деңгээлиндеги жетекчилер", - деп айтылат маалыматта.
Буга чейин Bloomberg басылмасы АКШнын президенти Жо Байден шайлоо кампаниясына каражат топтоо иш-чарасынан улам Украинадагы саммитке катыша албай калышы ыктымалдыгын жазган.
Украин президенти Владмир Зеленский конференцияга Байденди дагы, Кытайдын лидери Си Цзинпинди дагы чакырган. "Сураныч, соккулар арасындагы тыныгууну эмес, тынчтыкты, чыныгы тынчтыкты жакындатуу үчүн өзүңүздүн лидерлигиңизди көрсөтүңүз", - деген ал. The Financial Times Зеленскийдин кеңсеси украин аткаминерлери үчүн Байден менен Си Цзинпинге “коомдук басымды күчөтүү” үчүн эскертме түзгөнүн белгилеген.
Украинадагы согуштуу токтотуу конференциясы Бюргенштокто 15-16-июнда болот. Зеленский Борбор Азия лидерлерин дагы саммитке чакырган.
