Түз ободо Евробиримдик Иранга санкция салды

1-июнга караган түнү орус армиясы Украинанын энергетикалык инфрастра түзүмдөрүнө кайрадан чабуул жасады.

Бул тууралуу Украинанын энергетика министри Герман Галущенко билдирди.

"Запорожье, Днепропетровск, Донецк, Кировоград жана Ивано-Франковск облустарындагы энергетикалык объектилерге чабуул жасалды. Анын кесепеттери такталууда", - деди Галущенко.

Винницк облусунун администрация башчысы Сергей Борзов критикалык инфратүзүмдөрдүн биринде өрт чыкканын билдирди. Жабыркагандар жок экени айтылды.

Түнү Украинанын дээрлик бардык аймагында абадан айгай жаңырды. Украин армиясынын Аба күчтөрүнүн маалыматында, Орусия өлкө боюнча ар кандай типтеги 53 ракета, 47 дрон учурган. 35 ракета жана 46 дрон атып түшүрүлдү.

Орусиянын Коргоо министрлиги соңку чабуулдар тууралуу маалымат бере элек.

АКШ президенти Жо Байден Украина бийлигине америкалык курал менен Орусиянын аймагына сокку урууга жарым-жартылай уруксат бергенин бир нече маалымат булагына таянып Politico жазды, ушул эле маалыматты CNN да тастыктады.

Тактап айтканда, уруксат Харьков облусуна жакын жайгашкан гана орусиялык аймактарга атууга берилгени маалымдалды.

Расмий түрдө Вашингтон мындай аракеттерди колдобой турганын айтып келет.

Германия да Украинага берип жаткан курал-жарагын Орусиянын аймагындагы объектилерге сокку урууга тыюу салган чектөөсүн алып салганы белгилүү болду. Бул тууралуу 31-майда немис өкмөтүнүн өкүлү Штеффен Хебешрайт билдирди.

Анын айтымында, мындай чечимдин кабыл алынышына Орусия соңку кезде Украинанын Харьков аймагана чабуулдарын күчөткөнүнөн улам түзүлгөн абал себеп болду.

"Украина эл аралык укук талаптарына ылайык мындай кол салуудан коргонууга укуктуу", - деди Хебешрайт.

Европа Биримдигинин башкы дипломаты Жозеп Боррел Украинанын Куралдуу күчтөрүнүн Орусиядагы объектилерге соккусу, эгер пропорционалдуулук бар болсо, мыйзамдуу деп эсептелерин 28-майда биримдиктин коргоо министрлеринин жыйынында айткан.

Франция Орусиядагы аскердик объектилерге Батыштын куралы менен сокку урууга каршы эместигин, бирок мындай чабуул жарандык инфраструктурага жасалбашы керектигин айтып келет.

Бир нече күн мурда НАТОнун баш катчысы Йенс Столтенберг The Economist басылмасына курган маегинде Батыш мамлекеттери өзүлөрү берген курал менен Орусиядагы аскердик жайларды бутага алууга уруксат бериши керек экенин айткан. Көп өтпөй Софияда өткөн НАТОнун Парламенттик ассамблеясынын жыйынынын катышуучулары батыш курал-жабдыгын колдонууда киргизилген чектөөлөрдү алууга чакырган резолюция кабыл алышты.

Орусиянын бийлиги Батышты "от менен ойнобоону" эскертти. Президент Владимир Путин Орусиянын аймагына сокку урулса дүйнөлүк жаңжал тутанышы мүмкүн экенин айтты.

Украина Орусиянын соккуларын токтотуунун негизги жолу катары анын аймагындагы аскердик объектилерди жок кылууну атап келет. Бул үчүн ал Батыштан жардам иретинде алып жаткан курал-жаракты Орусиядагы объектилерге каршы колдонууга уруксатты көптөн бери талап кылууда. Батыш убада кылган курал-жарак кармалып жатканынан жарандарынан да, жерлеринен да айрылып жатканын айтууда.

Германия Украинага 500 миллион евролук (542 миллион доллар) аскердик колдоо көрсөтөт. Бул тууралуу 30-мартта немис коргоо министри Борис Писториус билдирди.

Курал-жарак жактан кезектеги жардам берилерин ал Украинага иш сапар менен барып, Одесса портун кыдырып, коргоо министри Рустем Умеров менен Киевдин аскердик муктаждыктарын талкуулагандан кийин билдирди.

Абадан коргонуу жана чакан радиустагы ракетадан коргонуу боюнча IRIS-T SLS зениттик ракеталык комплексине көп сандагы ракеталар, Кара деңизде чалгындоо иштерин жүргүзүүчү учкучсуз учактар, кошумча тетиктер берилери маалымдалды.

Украинага 2022-жылы февралда кол салып, толук масштабдуу согуш ачкан Орусия «атайын аскердик операцияны» ишке ашырып жатканын айтып келет.

Алгачкы бир жылда Украина Батыштагы союздаштарынын жардамы менен орус аскерлеринин чабуулдарына каршы туруп, айрым тарттырып жиберген аймактарын кайтарып алууга жетишкен. Бирок былтыртан бери фронтто абал кыйла өзгөрдү, украин бийлиги Батыш убада кылган жардам убагында берилбей, аскерлеринен да, жерлеринен да айрылып жатканын айтууда.

Украинада соңку суткада да Орусиянын чабуулдарынан бир нече киши жараат алганын жергиликтүү бийлик башчылары 30-майда билдиришти.

Харьковдо, облустук аскердик администрация төрагасы Олег Синегубовдун айтымында, бейшембиге караган түнү эки жерге ракеталык чабуул жасалды, үйлөр жана башка да социалдык инфраструктура имараттары талкаланып, жети киши жараат алды. Жалпысынан Белгород облусунун аймагынан Харьковго жети ракета учурулганы маалымдалды.

Херсон облусунда алты жергиликтүү тургун жараат алганын, үйлөр жана автомашиналар талкаланганын 30-майдын таңында аймактын администрация башчысы Александр Прокудин билдирди.

Украинанын куралдуу күчтөрүнүн басма сөз кызматы кабарлагандай, өткөн түнү Орусия С-300/С-400 башкарылуучу ракеталарынан сегизди, Ту-95 ТС стратегиялык авиация учактарынан атылуучу канаттуу Х-101/Х-555 ракеталардан 11ди жана Shahed-131/136 согуштук дрондорунан 32ни учурду.

Хмельницкий, Днепропетров, Черкасск, Кировоград, Запорожье, Одесса, Херсон, Киев жана Винница облустарынын аймагына учурулган дрондордун баары, канаттуу ракеталардын жетөө атып түшүрүлгөнү белгилүү болду.

Президент Владимир Зеленский кезектеги видео кайрылуусунда өнөктөштөргө рахматын айтып, Швециядан жардам келатканын билдирди:

“Бүгүн биз Швецияга ыраазычылык билдиребиз. Биздин аскерлерибиз дагы бир маанилүү жардам алышты. Бул олуттуу колдоо. Абадан коргонуу системабыздын ишин жакшыртуу үчүн колубуздан келгендин баарын жасап жатабыз”.