Рим папасы Франциск 1-январда жасаган салттуу жаңы жылдык кайрылуусунда аялдарга карата зомбулукту токтотууга чакырып, муну кудайга "акаарат келтирүү" деп атады.
"Ушунчалык көп аялдар зордук-зомбулукка кабылышат! Жетишет! Аялды таарынтуу бул кудайга акаарат келтирүү", - деди 85 жаштагы понтифик.
Өткөн айда жасаган кайрылууда дагы Рим папасы аялды уруп-сабаган эркектердин жосундарын "шайтандын ишине" теңеген.
Пандемия башталгандан бери Рим папасы Франциск бир нече жолу үй-бүлөлүк зордук-зомбулукка каршы кайрылуу жасады. Карантин чектөөлөрү маалында аялдарга болгон зордук-зомбулук кескин көбөйгөн.
Расмий маалымат боюнча Кыргызстанда жылдан жылга үй-бүлөдөгү зомбулук көбөйүп баратат.
Жакында эле Министрлер кабинетинин төрагасынын орун басары Эдил Байсалов быйылкы жети айда 8405 үй-бүлөлүк зомбулук фактысы катталганын ырастаган. Өткөн жылы жети айда 6060 окуя болгон.
